Union Home Minister Amit Shah chuan tun hnaia Kashmir-a mi firfiakten mi tum bik neia mi an thahna thleng zing lutuk chungchangah Nilaini khan National Security Advisor Ajit Doval a kawm a. Union Minister of State, Prime Minister’s Office Dr Jitendra Singh pawh a tel.
NSA Doval hi North Block-ah Shah nen hian an inkawm a. Darkar khat chuang an inkawm a ni.
Shah leh Doval inkawm hi Rajasthan-a mi, Jammu & Kashmir-a Kulgam-a bank manager kah hlum a nih ni-ah chiah a ni a. Hei hi Kashmir phaikuama mi firfiakin ni thum chhunga Hindu an thah pahnihna a ni.
Mi firfiak hi Elaqahi Dehati Bank Areh branch-ah lutin Vijay Kumar-a hi a kap a. CCTV-a a lan dan chuan branch pisa chhungah lutin a kap a, a tlanchhe nghal a. Kumar-a hi rang takin damdawi in panpui ni mah se an chhan hman ta lo.
Ni hnih liam ta maiah khan Hindu sakhua, zirtirtu, Jammu-a cheng, Rajni Bala chu Kulgam-ah tho hian mi firfiakin an sikul pawnah a kap hlum bawk.
Kulgam-a Bank manager kah hlum hi an thenawm chiah, Shopian district-a darkar 24 chhunga thil thleng hnu lawk a ni a. Civil mi, Farooq Ahmad Sheikh chu Thawhlehni zan khan an chenna inah mi firfiakin a kap hlum a ni.
Shopian-ah hian Nilaini zingah khan sipai phur lithei chu bomb hmanga beiin sipai pathumin hliam an tuar a, pakhat phei chu a na hle.
Army chuan sipai pathumte hi mi mal lirtheiin mi firfiak bei turin an thawk chhuak a. An tum hmun an pan mek laiin beih an tawk ta niin an sawi.
Rajasthan Chief Minister Ashok Gehlot chuan an state mi thah a ni a dem thu leh a tawrhpui thu a sawi a. NDA sorkar chu Kashmir-a muanna thlen thei lovah puhin khua leh tuite himna pe ngei turin a phut bawk.
Shah hian Doval a kawm bakah hian Lieutenant Governor Manoj Sinha pawh Delhi-ah kovin a kawm dawn bawk a. Sorkar laipui atanga puihna nasa tak an dawng chunga khua leh tui an him lo chu a chhan a zawh ngei rin a ni.
Kashmiri Pandit-te lawm lo
Kashmir-a mi tum bik renga mi firfiakten mi an thahna thleng nasa lutuk duh lohna lantir nan Nilaini khan Srinagar khawpuiah Kashmiri Pandit an pung khawm a. An zinga tam tak hi Kashmiri Pandit mite niin Kashmir phaikuam atanga tlanchhiate an ni a, an hlauh avanga tlanchhiat an tumnaa union territory sorkarin a dang chu an dem hle.
Thlalak thehdarhah chuan Kashmiri Pandit hi an tam hle a. An hruaitu, chawlhkar thum chhung duh lohna lantir tawh, Amit Koul chuan Srinagar-Jammu highway-a thil thleng a thehdarh a. NDTV hnenah Ramsoo, Ramban district chhuahsanin Jammu a thleng chiah tih a sawi.
An tlanchhuak tur dan nan hian union territory thuneitute chuan a danna an lo siam a, transit camp luhna gate an kalh bawk.
Kashmir-ah hian thla hmasaa Budgam-a magistrate pisa chhunga Kashmiri Pandit pakhat, Rahul Bhat-a kah hlum a nih atang khan duh lohna hi an lantir tawh hlawm.
Srinagar Airport chuan chanchinbua Kashmiri Pandit tam tham tak an thlawk chhuak nia tar lan chu a dik lo tih an sawi.
“Ni tin passenger 16,000 atanga 18,000 vel kan buaipui thin a, vawiinah pawh chutiang vel tho chu an ni a. Hnam tlem zawkte an thlawk chhuak nasa nia titi awm chu a dik lo, thu dik lo thehdarh lo vang u,” tiin airport thuneitute chuan Twitter-ah an tar lang.
Mi thahna thar a awm leh avang hian Kashmiri Pandit-te hian hmun him zawka an awmna siamsak turin sorkar an phut bawk.
Phaikuamah hian Kashmir Pandit 4,000 vel zet chu Prime Minister Narendra Modi-a’n puih a tiam angin an awm a; mahse, him lo hle zelin an inhria a ni.