Colombia-a chhanchhuah hna thawktute chuan chhun zan zawmin Thawhtanni atanga lungalhthei khur chhunga hnathawktu mi 14 tangte lak chhuah tumin an bei mek zel.
Leiverh chhunga gas lak luhna puak avangin a chhunga hnathawkte hi an tang mek a ni.
Thil puak hian miner pakhat chu pawnah a vawrh chhuak a, nasa taka kangin a hnuah a thi ta nghe nghe.
Thil lai chhuahna hmuna chhiatna thleng hi Colombia-ah hian thil thar a ni lem lo va, kum 2021-ah ringawt pawh khan mi 148 an thi.
Khur chhunga tang mek chhungte chu khur luhna ber bul lawka awm lui kamah inkulhin an chhungte lak chhuah tuma hna thawh mek hi an ngaichang.
“Hrehawm kan ti a; mahse, dama an lo let leh ngei beiseina kan la nei a ni,” tiin an zinga pakhat nupui chuan RCN radio a hrilh.
Thuneitute leh chhanchhuah hna thawktute chuan an tanna lai tak thuk zawng hi an chhut dan a inang hleithei lo va. Regional mining secretary, Jhon Olivares chuan metre 200 vela thuk nia an hriat thu a sawi laiin tual chhung chanchinbute erawh chuan metre 300 vel niin an tar lang thung.
Olivares chuan thil laih chhuahna hi dan lova siam a nih thu a sawi a. Kum 2021 khan a chhunga boruakalhthei tam lutuk avanga khar a ni a, May 19 khan hawn a ni leh chiah niin a sawi.
Chhanchhuah hna thawh hi boruakalhthei tam lutuk avang leh ruah sur tam lutuk avangin a sawt hleithei lo nghe nghe.
“Hmasawn a har hle a. Thil puak kha a na a, kang khan boruak tha lo a siam nasa bawk si a, chet a har hle,” tiin Olivares chuan a sawi.
Thil puak kha a na hle a, a kang pawh leiverh luhna atanga metre 15 zeta sang a invawrh chho va, kum 37 mi miner, Fabio Cáceres-a pawh vawrh chhuakin a thi zui a ni.
Engineer-te chuan a chhunga boruakalh-thei leh boruak him lo tam lutuk a chhuaha boruak tha pangngai a luh theih nan awng siam tumin an bei nasa hle bawk a. Thuneitute chuan chhanchhuaktute hi metre 150 vela thuk an thleng tawh niin an sawi.
Colombia-a civil defence force chuan a hmunah miner tangte him taka lak chhuah nan an awmchilh a ni.