YMA Sub. Hqrs, Lunglei chuan YMA kum puan, ‘Ram leh Hnam Humhalh’ hawnna hun an hmang a. Kumpuan hawnna neiin Lalrinliana Colbert, YMA Sub Hqrs Lunglei-a OB lo ni tawh chuan ram leh hnam humhalh tur hian tawngkam thiamna hmanga sawi fel chi a nih loh thu a sawi.
Nilaini zana BCM Hall, Serkawna kumpuan hawnna inkhawmah Lalrinliana Colbert chuan ram leh hnam hunhalh hi a thawha thawh ngai chi a nih thu a sawi a. “Kan hriatna leh thiamnate pung zel mah se, kan hnam ro thil leh pipute sulhnu leh thuam thil te hi vawng thain, a hmanna tur ngaihtuahin zah thiam ila, kan hnam zia leh khawsak phung erawh kalsan lo ang u. Chhungkaw din kawngah fimkhur ila, nupui pasal zawn kawngah kan Mizo hnam dante i ngai pawimawh ang u,” a ti.
Thusawitu dang, YMA Sub. Hqrs President Lalrotluanga chuan ram leh hnam humhalh tur hian tharum hmanga hmanhmawh taka hma la loin taimakna leh mahni intodelhna tur hawi zawnga zahawmna keng thei tura hma lak a hun tawh tih a sawi a. “Mahni thawh chhuah sa renchem chunga thawk chungin leilung hausakna humhalh tlat chunga hma la zelin, ngaihsan tur dik ngaisanga ringtu nihna vawng nung chunga kan nun zel chuan ram leh hnam hi Pathian pawh hian a humhalhpui zel ka ring a ni,” a ti a ni.
Kumpuan hawn inkhawmah hian Lunglei khawpui chhung YMA branch hrang hrang 21 atangin branch 19 aiawhte an kalkhawm a ni.