Mizoram a basketball inelna sang leh lian ber Mizoram Super League season 7 chu Nilaini zan khan khelh tan a ni a. Match hmasa ber a inkhel Chanmari Vikings leh Mission Veng Hotshots te inkhel hmuhnawmah 78-72 in Hotshots an chak.
R Dengthuama Indoor Stadium a inkhelah hian inkhel tan tir atangin Mission Veng chan a tha zawk a. An ball ‘shoot’ a kal zawk bakah an khingpuite ball chhuksak a ‘fast break’ ah an hlauhawm zawk a, point pawimawh score nan remchang an neih an hmang thin.
Halftime-ah 40-33 in Hotshots in hma an hruai a. 3rd leh 4th quarter-ah Chanmari in pawhthlak tumin nawr mahse an inveng tluan a, a tawpah hnehna an chang.
Hotshots tan state pawn player Arshdeep Singh chuan point 22 leh rebound vawi 6 a nei a. Defense-ah an rim vengtu rintlak a ni a, offense-ah an khingpuite tan ‘paint’ chhungah a hnawk.
Eddie Zairemmawia leh Zonunsanga ten point 15 leh 14 an thawh.
Chanmari Vikings tan Michael F. Lalawmpuia chuan point 22 a score a. Vanchuangpuia’n point 14 leh rebound vawi 5 a la ve thung.