Thla hnih zet an chai hnu ah Dollar Maktaduai 50 man lawihIntihhmingchhiat thubuaiah Johnny Depp chuan a nupui hlui Amber Heard lakah hnehna a chang. Nilaini khan Virginia court-ah jury chuan thlutukna siamin Depp lam an hawi.
US jury chuan Amber hian a pasal hlui Johnny hi a timualpho ngei a ni, tiin 2018 kuma chanchinbu pakhata a article ziaha In chhung khura kut thar tuar thin nia a in tarlang chu pasal te tihmualphonaah a ngai.
Mr Depp (58) hnenah zangnadawmna $Maktaduai 15 pe turin Amber (36) hriattir a ni a, a pasal hlui khinglettu hian compensatory damage-ah $Maktaduai 2 a dawng ang.
Member pasarih awmna jury-in thutlukna an puan veleh court leh court pawm lam atangin thawm a tha hle a, ‘Johnny’ hming lam nawn awn awn an tam.Mr Depp hi court-ah a inlan lova, hna pawimawh thila UK-a awm hian TV atangin a lo thlir. Nupui kutthlak thin a puhin thiam a chang ta!
SIAMTHAR LEHNA
Kum 5 liam ta vel atang khan Depp hian a eizawnna kawngah chhiat a tawk chho zut mai a, project lian ‘Fantastic Beasts’ leh ‘Pirates of the Caribbean’ angah te thlauh thlak a ni.
Amaherawhchu, Virginia court-ah intihhmingchhiat thubuai nena court-a a inlan chiah khan social media leh fans te atanga thlawpna mak leh duhawm tak a dawng chho mawlh mawlh mai a, a nupui hlui Amber chetdan leh khawsak dana lungawi lo hi a tam zawk an nih vangin Depp hian tantu leh thlawptu a ngah.
Thla hnih dawn thubuai ngaihtuahnaah hian a fans ruhkawlte chuan thubuai leh sawihona reng reng hi an umzui vut vut a, nimina thlutkna siam a nih phei chuan internet Inpui hi hlimin a lam a ni mai lovang maw, tih theih tur khawpin lawmpuina a ri chuah chuah.
KHAWVEL MIT FUKNA
Hollywood actor pahnih te hi 2017 khan inthenin, thubuai chai chhung zawng hian an inkara thil thleng chipchiar leh boruak duh-awm lo tak tak hailan mawlh mawlhin a awm.
Fairfax, Virginia lam hawiin khawvel mipui tam zawkin mit an len a, ngaihtuahna an seng. Mr Depp leh Ms Heard te inneihna duhawm lo tak, a tawpna kha tak bawk si chu chiang lehzuala pholanin a awm bawk.
Mipui ngaihdan lakkhawm hrang hrnagah American tam zawkte’n Ukraine indona leh US Supremem Court-in nau tihtlak chungchangah thutlukna a siam tumna lam ai mahin courtroom drama an ngaihven zawk daih.
TV kaltlanga LIVE-a pekchhuah hian social media-ah view billion tam tak a nei reng a, khawvel hi a luahkhat a ni ber.
VUAK LET
An inkar buai lehzualna hi 2018 khan intanin Ms Heard hian Washington Post chan-chinbu-ah In chhung khura kutthak tuar thin dik tak a nihna a ziak lang kua ta mai a.
Heath hian a pasal hlui hi hming hmerin a tarlang lem lo. Mahse, a hun laia Hollywood star hlut hlawh ber ni pha ngat Mr Depp tan a chaw belh leih buaikna ang hlauh a ni thung.
$Maktaduai 50-in a khing ta rup maia a, a nupui hlui pawhin $Maktaduai 100 in a khinglet. California-a cheng an nih rualin, an thubuai hi Virginia county-ah ngaihtuah a ni daih thung. Hei hi Washington Post printing press innghahna hmun a nih vang a ni.
Anni pahnih ni 2011 khan ‘The Rum Diary’ film-ah intawng in, February 2015 khan an innei a, a hnu kum hnihnaah an inthen.
ENGNGE AN SAWI?
JOHNNY DEPP
“Kum 6 kalta khan ka nun, ka fate nun leh chhungte nun bakah mi tam takte nun bakah kum tam tak chhung ka laka rinna nghat a, min thlawptlattute nun chu chatuan ata mit khap kar lek chhungin a danglam vek…Kum 6 a liam meuh chuan jury te’n nun min neih tir leh ta a, nun tharin bung thar keu a ni ta,”
AMBER HEARD
“Vawiina beidawnna tawpkhawk lo thleng ta hi thu-a sawifiah rual a ni lo. Evidence tha leh rintlak tak tak chhawpchhuah a ni chung paw’n ka pasal hlui huhang leh thiltihtheihna chuan a vai kiang ta duak mai.A tawpa thutlukna siam hian mi tibeidawng lehzual a, hmeichhe tam tak tan hnungtawlhna a ni. Hmeichhiate laka hleilenna hi ngaihthutak hle tur a ni tihna thlengin a hnawt kir ta.”