- Mahmuaka Chhakchhuak
A hming ringawt pawh hi a nelawm loh a, a uar zawnga sawi phei chuan ‘a rapthlak’ te pawh a tih theih hial awm e. Nia, thihna hian ngainat a hlawh lo a, khawi hmunah mah hian a tlangtla tak tak thei ngai hek lo a, tumah hian kan hlim taka kan hmachhawn tak tak theih hi a rinawm hek loh. Nimahsela mitinin kan hmachhawn tura leilung pian tirh ata tawh Khuanu lo duan lawk tawh a nih miau si avang hian kan hmachhawn ngei ngei ngai tura kan ngaih a tha awm e. Chutih rual chuan engtia hmachawn tur nge ni ang a, engtia dawnsawn tur nge ni ang tih erawh sawi lawk thiam har tak erawh a ni mai thei a, mitin tawn dan a in ang lo theuh angin mitiniin kan hmachhawn dan tur pawh a danglam thei bawk ang.
Thihna hi a runthlak lai ber chu damchhung huna a hnu leh a awm tawh lo tur hi a ni. Zinbo leh khawi emaw hmuna thangbote nen a in ang lo a, Thihna chu a tawp vang vang a, a hnu leh chu thlarau lam thil chauh a ni tawh si. Thihna hmanrua erawh chi hrang hrang a awm thei ang nga, a hmanrua hi a lianin a lianlo thei bawk ang. Natna khirh tak neih avanga thihna kotlanga dak tura inngaih ngawt tur pawh a ni chuang lo a, beisei loh leh rin loh tak tak hian a thleng thut thut bawk si a nih hi. Chatuan hmun hi a awm tak tak turah ngai ila, chu hmun chu mihring finna leh hriatnain a hriatthiam phak rual loh a nih si avangin chu hmuna kal tur chuan kan taksa ngei pawh tihdanglam a ngai niin kan Pathianthuah kan hmu a, tihdanglamna hmanraw pakhat pawimawh em em chu kan sawi lai mek Thihna hi a nih tlat si avangin nang leh kei hian kan paltlang ngei ngei a ngai tihna a ni ber mai.
Thihna hi tuar thiam deuh an awm a, tuar thiam lo deuh pawh an awm a, an demawm hauh loh. A thim zawnga ngaihtuah chuan Thihna hi thil runthlak ber a ni theiin pawi zawng zawngah hian a pawi ber a tih theih hial ang nga, a tuar thiam deuhte pawhin an innghahna nia lang chu thih hnu piahlam rama la inhmu leh tura an beisei vang pawh a ni ngei ang. Engpawh nisela, thihna hi mihring lam chan leh mihring ruahman dana thleng a ni lo a, thihna chungah thuneitu a awm tlat avangin a remruatna zawk chu mihringte pawhin kan innghahna leh kan lawmna tur zawk chu a nih hmel. Mi tam tak lusun tawhte ka lo hre tawh a, sakhawmi nih vanga tuar lo tura ngaih bik ngawt a lo dik loh ziate pawh ka lo hre tawh. Tuar thiam loh vanga khaweng hmu lo leka nun hmangte pawh an awm hial thei bawk ang. Nimahsela kan thatna turin kan chunga roreltu hian ro a rel ang tih pawm ngam tu apiangte erawh chuan thihna atang hian hahdamna an chang mai chu a nih hi.
A hmanrua mawlh hi mihringte hian pai dam har kan ti niin a hriat. Enkawl hman loha boral thutte, beisei loh leh rin loh lutuka nunna chan ta maite pawh mi tam tak an awm. Chungte chu a tuartu tan chuan na tak a niin thihna chunga thuneitu Pathian lakah pawh an vuina tam tak pawh a ni thei awm e. Nimahsela thihna hi kan hmaa awm vek a ni tih hrereng chung hian inbuatsaih lawk erawh kan tlem viau ang lawi a, hetia kan chunga a rawn thlen tak avanga thleng ta thuta ngai hi kan tam mai awm mange a tih theih. A nihna takah zawk chuan kan chunga roreltu hian a rorelnaah min telin kan ngaihdan hi min zawt lem si loh avang hian thihna ngei ngei pawh nun tawpnaa ngaitu tam tak kan awm avang hian kan chunga a rawn thlen hian kan tuar thiam ta lo mai pawh niin a lang. Ringtute tan chuan nunna nei tura thihna hmachhawn phawt a ngai a, chutiang bawkin kal hmasa zawkte an awm a ngai a, kal hmasate chu vanneihna chang zawk ang hiala ngaihna pawh a awm thei bawk ang.
Thihnaah hian ringtute leh ringlotute danglamna tam tak a awmin ringtute tan chuan thih hnu piah lamah beisei tur ala awm avang hian kan ngaih a tha ni bawkin a hriat. Chuti ni lo sela chuan thihna hi a rapthlak ngawt ta ve ang. Nimahsela chuti chung chuan lawm thiam erawh kan tlem ang viau thung a, Pathian laka vui dawn dawnte hi kan awm hial mai. Eng hi nge maw ringtu kan nihna chhan hi ni a, eng hi nge maw ni ringlotute aia kan danglamna chhan hi ni ang tih hi ngaihtuah tham tak a ni thei ang. Pathian nung ringtu kan nihna avang hian thil tha zawng zawng dawng a, beisei tur pawh kan ni kherin a rinawm loh a, Zawlnei Jona tawngkam angin thil tha kan hmu ang a, thil tha lo pawh hmuh kan hmu tur a ni dawn lawm ni. Natna kan tuar a, damna dilin kan tawngtai a, a tha. Natna atanga Pathian fak thei tur zawka inbuatsaih tur kan ni dawn lawm ni. Chutiang bawkin thihna ngei pawh mihring ngaih chuan tawrhna nasa tak chu a ni ngei, hei aia nasa tawrhna pawh hi a awm tawh kher lo ang a, chuti chung chuan ringtu chuan thihnaah pawh lawm thei turin kan inbuatsaih dawn lawm ni. Nunna tur a kailawn pawimawh ber a ni miau si a, dam reng hi thil thlakhlelhawm tak pawh a ni ber dawn em ni. Mi thenkhat dam rengte hi chu hremna emaw tih mai tura tu tan maha tangkai nei lo leh anmahni pawhin nikhat pawh rei an tiha an nin ngawih ngawih hi an lo awm nual mai thei a sin. A nih loh pawhin mahni chenpuite ngei ngei pawhina hnawk an tih leh an michuang kawl emaw hial tawhte tan phei chuan Pathian lama mitvarna an neih loh phei chuan dam hi malsawmna lam zawnga ngaih chu a har mai thei e.
Dam hi a hlu a, thlakhlelh tur pawh a ni ngei mai tak nain kum sawm sarih, chakna avanga kum sawm riat emaw chhung chauh thlahlel a, chu aia rei leh kumhlun tur zawk Chatuan hmun zawk thlir a, chu hmuna thleng tura inbuatsaih lo kan nih chuan mi azawnga mi khawngaihthlakawm ber kan ni hial zawkin a rinawm. Chu mi hun chu Khawbung Patea chuan ‘Ni Ropui’ tiin a sawi a. Chu ‘Ni Ropui’ ngei chu Darlene Zschech leh Michael W Smith te sak ‘The Great Day’ ai pawhin a ropui zawk mai lawng maw ka ti hial a ni.
Khawnge Patea hla hi chang khat leh a thunawn chauh tal han tarlang ila –
Ni ropui alo thleng dawn ta,
Kan nghah Lal Imanuel;
Sual leh ramhuai tlawmna ni chu,
Chhandam fate kan zalenna tur chu.
Chumi hnuah chuan hlimin ka zai ang,
Lal ram buatsaih chatuan hmun ka chang ve ang a,
Aw, ava hlimawm dawn em!
Hlim tawp hlau loin ka leng ang.