Aizawl : June 5, 2022 khan Excise & Narcotics Department (END) chuan heroin thahnem tak leh a neitua puh an man.
END hian Zote, Champhai district leh Bulfek, Myanmar inkar kawnga awm, Tlangcheng khuaah heroin gram 306 (hawng 25) leh a neitu nia puh – Robert Thansumlanga, 29, bethel veng, Champhai-a khawsa mek nia inchhal an man.
Robert Thangsumlanga hi dan tlawh chhanin thubuai siamsak a ni a, District & Session Court, Champhai-ah hruaiin District Jail-ah dah luh nghal a ni.
Hetih lai hian, END thuchhuah chuan May 27, 2022-a Aizawl khawpui hmun lun laia dawr thenkhatah ualau takin zu leh a kaihhnawih zuar an awm tih report dawn bawhzuia hma an la tih an sawi a. He an hmalakna atangin Korean Soju (360ml) – 171 bottle, Beer (500ml) – 91 can, Royal Stag Whisky (750ml) – 13 bottle, leh Magic Moment Vodka (750ml) – 10 bottle an man tih an sawi.
Millennium Centre chhunga dawr thenkhat atangin Korean Soju (360ml) – 32 bottle, Beer (500 ml) – 15 can, Champwine (750ml) – 2726 bottle, Champwine (375 ml) – 3675 bottle leh Dark Wine (375 ml) – 16 bottle an man tih an tar lang bawk.
He’ng bakah Millennium Centre chhunga dawr atangin khawi lam chhuak nge tih hriat loh wine hrang hrang – Fanai Wine (750ml) – 294 bottle, B.CH. Grape Wine (750 ml) – 226 bottle, Apple Wine (Tagged Apple Juice) – 660 litre leh Grape Wine – 32 litre an man tih an tar lang.
He’ng an man te hi tuna Mizorama zu khuahkhirhna dan hman mek, The Mizoram Liquor (Prohibition) Act 2019 hnuaiah khap vek leh man theih vek an nih tih END hian an tar lang a ni.