Aizawl: MNF Adviser Lalruatkima chuan MNF chu Pathian thua innghat, BJP, Congress leh ZPM ten an neih ve lo innghahna nei an ni thu a sawi.
Falkland-a Electric Veng Unit II MNF Unit Political Training Inrinnia a hmanpuiah thu sawiin Lalruatkima hian MNF party chu political party dangte ang lo takin ‘Pathian leh kan ram tan’ titu an ni tih a sawi a. Mizo hnam awm chhung chu MNF a awm dawn tih sawiin, “Kan ram, kan hnam, kan sakhua a him theihna turin MNF hi din a ni a, Pathian thuah kan innghat tlat a ni. BJP, Congress leh ZPM-ten an neih ve loh innghahna kan nei a, Pathian leh nationalism-ah kan innghat tlat a ni,” a ti.
Lalruatkima chuan MNF sorkar hnuaiah kawng a that thu te, ni tin mamawh a hnianghnar thu te, ramri humhalh thu-ah te sorkarin a thawk tha hle tih a sawi a. Sakhaw hruaitute, NGO hruaitute, politician te hi an neih that thu sawiin ram chhe ta vek anga sawi hi zirtirna dik lo a nih thu a sawi bawk.
“Pu Zoramthanga sorkar, hun harsaa ram hruai tlaka Pathianin a ruat hi hun lawmawmah pawh Pathianin he ram hruai tur hian a dah leh ang. Chuvangin, 2023 inthlanah pawh hian Pathian leh mipui zarah MNF chuan sorkarna a chang leh ngei ang. Chumi hunah chuan malsawmna nasa zawk mipuiten kan chang za ngei ang,” Lalruatkima hian a ti a ni.