Japan International Cooperation Agency (JICA) Survey team-in nimin khan Raj Bhavan, Aizawl-ah Larsap Hari Babu Kambhampati kawmin, Mizoram state super- specialty cancer and research centre (MSSSCRC) sak hna thawh thuai a nih theihna tura uluk taka survey an tan tawh thu an hrilh.
JICA survey team leader Hiroshi Ako chuan survey an kalpui dan te, MSSSCRC sak an tum dan te, sak zawh hmaa state sorkar atanga thawktu tur lak leh thil pawimawh dang lo chinfel ngai chungchangte leh he project kaihhnawiha hriattur pawimawh Larsap chu a hrilhfiah a. MSSSCRC project chu a tha thei ang bera duan a nih thu leh state sorkar leh mipui thlawpna an mamawh zel tur thu a sawi.
Survey hna kalpui mek chuan kum 2 emaw a la duh tura chhut a nih thu JICA survey team chuan an sawi a. Kum 2028 kum tawpah chuan MSSSCRC chu a mamawhtute tana hman theiha peihfel beisei a nih thu an sawi bawk.
Larsap Hari Babu Kambhampati pawhin Mizoram mipui ten Cancer damdawi In tha bik a neih theihna tur sum leh thluak sengtu JICA official te leh JICA survey team chungah Mizoram mipui aiawhin lawmthu a sawi a. Zoram mipui leh sorkarin an hmalaknaa thlawp tlat an tum thu hrilhin, state sorkar lam atanga tih tur tul te pawh Mizoram sorkarin tha taka a tih tur thu a sawi.
“Vanduai thlak takin Mizoramah cancer vei an tam hle a, a tam zawk chu damdawi in changtlung zawk – Delhi, Mumbai, Vellore, Kolkata leh hmundangah te kalpui an ngaih tlangpui thin avangin cancer inekawlna senso a hautak” Larsap chuan a ti a. “MSSSCRC sak zawh hunah erawh chuan cancer vei te tana senso sang lutuk chu a ziaawm tawh dawn hle” a ti bawk a ni.