Aizawl : Mizoram Pradesh Congress Committee (MPCC) president Lalsawta chuan Mizoram hi mi taimate hlawhtlinna ramah siam a, thawhrimna hmanga dinchhuah chu Congress party thil tum a nih thu a sawi.
Thawhtanni khan Thingdawl-a mi thar lawm luh inkhawm neihah thu sawiin Lalsawta hian, Congress party-in sorkarna an chang a nih chuan thalaite, kuthnathawktute leh loneitute’n an mahni phak tawka hna an thawh piah lamah tih theih loh chin an neihah, puihna tur ‘|ang puih’ siam an tum thu a sawi a. “Mi taimate hlawhtlinna ramah he Mizoram hi siam kan tum a, kan tanrual chuan kan hlawhtling ngei dawn a ni,” a ti.
Party dang president-te angin kawng hahdam leh nawmsakna ringawt a tiam ve thei lo tih sawiin, “Vawiinah hian beidawng tawh eng emawzatte tan thawhrimna ka tiam a che u,” tiin Lalsawta hian, thawhrimna hmanga dinchhuah an tum dawn tih a sawi a. “Mizoram hi ram tha a nih theihnan theihtawh chhuahin rim takin i thawk ho zel ang u,” a ti bawk.
Lalsawta hian ram leh mipui hmang tangkai thiam apiang ram vannei an ni a, he’ng thil pahnih te hi Congress party chuan a hmang tangkai dawn tih a sawi a. Ram leh mipui hmang tangkai turin thil pahnih – min tuamtu boruak leh nungchate, environment ngaih pawimawh tur an neih thu a sawi a. Eng ang pawhin development hi nei thain, hausain, millionaire pawh ni mah se, an moral a chhiat miau chuan mihring tan a pawi a tih thu a sawi.
Tuirial Block I President R. Malsawmthanga kaihhruai lawm luh inkhawmah hian lawmluhte atang thusawi ngaihthlak a nih bakah H. Rohluna, MPCC General Secretary leh Vanlalzuiliana, ADCC President-te pawhin thu an sawi bawk.
Congress party thuchhuah in a tar lan danin, Thingdawl Unit VIII huamchhung atangin chhungkaw 20 atangin mi 59 lawm luh an ni.