Chhungkuaa member thar an lo pun belh hnu-a nupa nun hman hi a Saptawng takin ‘sensitive’ tak anih avangin phur thuta kalpui chi emaw rikpui rum rumna chi a ni hauh lo. Naute a lo awm tawh a, chhun leh zan pawh thliar lovin nu ber a buai a, a luhai thlak tawh lutuk!
Engpawhnise, chhungkaw member dang lo luhna ah hian in duh emaw duh lo emaw, nupa nun hman hi chu hrisel tha pangngai in nih chuan loh theih lohva kalpui tur tho chu a ni a. Chuvang chuan, nauneih hnu-a nupa nun hman chungchanga hriattur langsar zual i han bunchhuak teh ang.
Naute neih hnu hian nupa nun hman hun tur dik tak hi a awm hran lo tih hre hmasa phawt ang che. Doctor thurawn i lak hmâ hauh atang khan in nupa-in khunkhan tak, inhawng tak ni bawk siin sawi-dun rawh u. Nupa thenkhat chu thlakhatna ah an hmang a, thenkhat erawh hei aia rei pawh an nghak phawt thin. A pawimawh bera chu, i pasal khan hnawl nia inhriatna a nei tur a ni lo, i hlauhthawnna leh huphurhrukna thlengin tlang takin i hrilh dawn nia.
Ni e, nauneih hnu-a nupa nun hman hmasak berna hi a hrehawm theihna chen a awm dawn a, a fuh zaih lovang. Chuvang chuan, dawhtheihna a pawimawh a, pa ber khan a hun leh a hmun a hriat a tul tak meuh. A zei lo deuh anih chuan kawng hmang kawh-hmuh tur a ni. Duat takin in pawm ula, fawh thianghlim inhlan u la, in inpeih hun a thlen hmâ loh chuan taksa innek lumna a tam thei ang berin kalpui ngei ang che u.
Nauneih hnu hian taksa pian leh lan dan-ah danglamna a lo lang dawn a, mahnia insitna leh indemrukna thlenga a lo awm pawhin thil pangngai tak a ni a, i nihna leh landan ang ang kha lungsi taka i pawm mai kha a hahdam thlak ber. Serh leh a vela tihrawl leh thisen luanglut a that lehzual theih nan doctor remtihna la a, taksa insawi- zawi a pawimawh. Ei leh in-ah pawh duhtui lehzual hun a ni.
Nupa nun hmang turin a boruak (mood)-ah i chen loh chuan ‘Aih’ tingam rawh. Midang zawng aia nangmah hrechiang a, hrethiam ber tu ni tur hian i pasal hian mawhphurhna lian tak a nei. Tin, nupa nih vang maia ‘nupa nun hman ngei ngei tur’ ti-a innawr beh tlatna thinlung kha paih hmak tur a ni. Hrisel tha pangngai i nih chuan tisa châkna hi kawng hrang hrang hmangin a lo chhuak tho ang. I inpeih loh leh phur chiah lohna vang ringawta pasal te beidawng ta viau tura ngaihna kha a dik lo, thil awmdan hrilh ang che.
A tir lama tarlan angin, nu tam zawkte hi naute enkawl leh In chhung sekrek khawih tulna vang hian an chau ngawih ngawih thin a. Hei hian pasal te nena inkar pawh eng-emaw chen-ah nghawng a thlen avangin In khata cheng reng chung si a, inhlat tlata hriatna hi a lo awm nghal thin. Chuvang chuan, naute muthilh tui lai chan te pawh a ngaih châng a awm ang.
A tawp bera atan chuan, chawlh hahdam a pawimawh. Nauneih atanga thla 6 chhung hi chu indimdawi a, inenkawl uluk a tul hle a. Thla 6 a liam tawh chuan holiday nuam tak hmang tura pa ber nena zin-chhuah emaw hawi thawthang hi kalpui ngei ngei tur a ni. Nupa nun hlim tak chen tur chuan mipat hmeichhiatna chauh hi a tling zo lova, a tam thei ang bera hun inhmanpui te, duat taka inpawm te, tawngka leh thil tih-a duhsakna tinreng inhlan te hi hmaih loh tur a ni.