NGO Coordination Committee Chairman R Lalngheta chuan sorkar laipuia Mizo ngei chief secretary dah tura an duhnate a hriatsak tawh avangin chief secretary ni lai, Dr Renu Sharma pisa kai tur danga hmalak an tum tawh loh thu a sawi.
The Zozam Times zawhna chhangin Central YMA president ni bawk, R Lalngheta chuan, “Sorkar laipuiin kan thu leh hla an hre tawh tho a. Chuvangin, chief secretary pisa kai dang ang zawnga hmalak chhunzawm tawh loh nise kan ti a. A tul angin central lamah kan la thlir zui zel ang kan ti,” a ti.
Chief secretary danga hmalak chungchangah NGO Coordination member zingah duh lohna lam sawi an awm lo tih sawiin, “Tuna kan chief secretary ni lai, Dr Renu Sharma hi haw se tih hi kan tih tum a ni lo a. Union home minister-a kan thu thlenah pawh chiang takin kan duh dan kan ziak lang a. Tuna hmalakna hi kan rilruah chuan central koh eih nan ti kha kan ni a. Chuvangin, a duh lo lam an awm lo,” a ti bawk.
Tlawmngai pawl lian panga intelkhawmna hian Mizoram chief secretary atana Mizo tling an awm lai leh hetiang dah tura sorkar laipuia an ngenna chuan ngaih pawimawh a hlawh loa ngaiin, May 30, 2022 khan thuthar thehdarhtute hmaah chief secretary ni lai pisa kai tur chu May 31, 2022 atanga tiam chin awm loa dan an rel thu an puang a. Mahse, chief secretary hi a zin avangin an thil tum hi an thulh leh a ni.