French Open-ah lal ngai a lal a, Rafael Nadal bawkin Coupe des Mousquetaires chu chawiin final-ah a khingpui Casper Ruud chu straight set in awlsam takin a hneh.
Spanish star hian French Open record a siam chu a belh zel a, a vawi 14 nan he tournament-ah hian a champion a. Tennis player hlawhtling ber ni tura inum pathum – Roger Federer, Novak Djokovic leh ani te zingah vawi 22 Grand Slam la tawh niin hma a hruai.
Kum 36 mi Nadal hian a khingpui seeded number 8 hauhtu, Norwegian player Ruud hi 6-3 6-3 6-0 in a hneh a. Final a inkhelah hian Ruud hian inkhel tan tir lamah Nadal hi bei let ve thei viau mahse set khatna a lak hnuah Nadal-a’n buaina a tawk meuh lo.
Nikum semi-final a Djokovic laka tlawm Nadal hian Paris a clay court tournament-ah hian match 115 khelin match 112 hnehna a chang tawh.
January thla a Australian Open a lak hnuah Nadal hian Roland Garros-ah hlawhtlinna a neih lehnghal avang hian kum 2010 hnuah a zawna Grand Slam tournament a champion leh hmasak ber a ni a. Hemi tum hian French Open, Wimbledon leh US Open-ah te a champion.
Nadal hi French Open men’s singles inelna a champion thei upa ber a ni a, kum 36 leh ni hnih a upa niin a hnampui Andres Gimeno-a’n kum 1972 a kum 34 mi ni a record a siam chu a khum.
Tun tournament-ah Nadal a che tha tluang a, a inkhelah erawh a vanglai ang a ni tawh lo tih erawh a hmuh theih. Mahse kumin French Open-ah ani paihthla thei an awm lova. A ke ah hliam a neih avanga nachhawkna a chiu ngai thin a ni a, nakruh hliam avanga thla hnih chawlh ngai a nih bawk avangin a inkhel a hriam lo.Heti chung hian kum 23 mi Ruud lakah final-ah a kheltha hle a, quarter-final ah Novak Djokovic a hnehdan a fakawm bawk.
Wimbledon-ah a chiang lo?
Nadal hian a champion hnuah a hma lam hun zawhna a chhang a. “Inkhelh chhunzawm a champion tura beih hi a hautak a. Chuvangin inzavai chungah lawmthu ka sawi duh. Ka hmalam hun thui tak sawi thei lo mah ila hmalam pan a beih zel ka duh.” a ti a.
Wimbledon chungchang bikah, “Tuna ka taksa dinhmun hi kan hre vek a, hetiang chuan a inkhelh reng theih dawn loh. Ka ke a nat loh nan inchiu ka mamawh thin a, tun kar hnih chhung ka inkhelh theih phah. Wimbledon hi khelh ngei ka duh a, mahse ka taksa in hma a sawn loh chuan inchiu chunga inkhelh lui chu ka ti tawh lovang.” tiin a sawi.