MNF party-in nimin khan Mizo Hnam Rûnah chhung inkhawm an nei a, he huna thusawitu, an party adviser, Supply Minister K Lalrinliana chuan Mizorama tuialhthei dahkhawlna tur, oil depot siam hna chu tan thuai an tum thu sawiin, “Tun atanga thla thumah hna tan theih kan beisei,” a ti.
Supply minister chuan Mizoramin oil dahkhawlna a neih chhun chu petrol pump a nih thu leh oil dahkhawlna tikhat vek pawh ni se ni nga bak a daih lo tih a sawi a, Mizoram chu India rama oil depot nei lo awmchhun a ni a, MNF an sorkar tirh khan oil dahkhawlna neih tumin hma an lak nghal thu leh a hmun tur an inbiak fel hnuah company lamin duh dan dang an nei leh avangin hna an tan thei ta lawk lo tih a sawi.
Eirawngbawlna gas chungchang sawi bawkin, an sorkar hmain Mizoramin ni khatah trip 15 a dawng a, sorkarna an chan hnuah central lam an ngen angin ni tin trip 23 a thleng tawh tih a sawi a, “Tunah hian thla thum daih dah khawlna neih kan tum mek,” a ti.
A department chan dang, fisheries hmalakna hrang hrangte sawi bawkin, “Mizoramah sangha chi kan intodelh lo a; chuvangin, a pui vulhna ruahman a ni,” a ti a, Mizorama awm sa sangha chi li enchhin mek a nih thu te, sanghaah tal intodelh a tul tih a sawi a, a humhalh kawngah YMA nen tangruala lui dung ven hnathawh a nih thu a sawi.
MNF Adviser Rintea chuan party dangte chuan an hotupa ber tihchhiat chu an tum ber a nih thu sawi bawkin, “Kan chief minister hian vision a nei. Vision nei lo chu politician ni tlakah ka ngai lo. Kan CM hian vision neiin hna a thawk a, chawpchilha tihhlawhtlin theih lohte a nih avangin eptute hian remchangah lain kan pu beih nan an hmang a ni,” a ti bawk a ni.