Aizawl North II bialtu MLA Dr Vanlalthlana’n nimin khan a biala Ramhlun Venglai-ah YMA Day leh Ramhlun Venglai branch YMA Silver Jubilee lawmna hmanpuiin, MLA fund hmanga lei Ambulance a hlan.
Dr. Vanlalthlana chuan khawtlang tana ke penna kawng hrang hrangah inpekna a pawimawh thu sawiin, zirna kawngah tan lak nasat a ngai tih a sawi a. Chhungte leh midangte kep ngai lova mahni kea ding thei tura tan lak a tul thu a sawi.
“Ram leh hnam humhalh kawngah ramri chauh humhalh tum lova, kan hnam kan humhalh tel a ngai” Dr Vanlalthlana chuan a ti bawk.
Ramhlun Venglai branch YMA-in YMA Day leh an dim champha kum 25-na an lawmnaah hian hruaitu hlui te chawimawiin, an veng mi HSLC leh HSSLC pass thar te leh Cricket champion team te chawimawina leh lawmpuina hun an hmang nghal a ni.