Aizawl West III bialtu MLA VL Zaithanzama’n “Ram hruaitu an huaisen chuan hnam a huaisen thin a, hruaitu dawihzep hnuaiah hnamin ram a chan thin” a ti.
YMA, Bungkawn Vengthar branch-in YMA Day an lawmna a hmanpuinaah VL Zaithanzama chuan he thu hi Nilaini zan khan a sawi a. Russia president leh Ukraine president te an ram tana tha tura an ngaih anga huaisen taka an kal te, Israel ten an hnam leh sakhua humhalh tura theihtawp an chhuah dan te, hnam rilru pua an taimak dan leh huaisennate entawntlak a nih thu a sawi.
VL Zaithanzama chuan hnam leh sakhua bakah tawng thlenga humhalh a tul thu sawiin, “Hemi kawngah hian mitin ten mawhphurhna kan nei” a ti a. Inpumkhatnain chakna a siam a, YMA Day lawma hall-a leng lo khawp mipui kalkhawm chuan veng mipui inthurual zia leh YMA hlut zia a lantir niin a sawi.
“Vawiina kan ngaihsak hman loh te hi kan hun tawpa min buaipuitu tur leh he hnam humhalhtu ropui an ni tih hriain i YMA zel ang u,” a ti bawk.