Land Revenue & Settlement Minister Lalruatkima leh Forest Minister TJ Lalnuntluanga hovin nimin khan Agriculture department hotute leh Land Revenue & Settlement department hotu ten Champhai district-a WRC ram (Champhai leilet area) humhalh chungchang an sawiho.
Champhai district-a WRC ram humhalh chungchang hi vawi engemawzat sawiho ni tawhin, Champhai leilet area pawh a hmuna enfiah a ni tawh a. Enfiahna report chu nimina thukhawm chuan an thlirho a ni.
Sorkar thuchhuahin a tarlan danin Champhai leilet area chu special economic zone (SEZ)-a puan tura ruahman rawt a ni a, Nikum July khan Land Revenue & Settlement chuan Champhai Leilet area-a Agriculture lam hmalakna ni lo chu engmah hmalakna dang kalpui phal a nih loh thu pawh thupek a tichhuak tawh. Champhai Leilet area chu Hactare 606.66 a zau niin, Leilet area-a pass neisa te chu an pass neih mila siamremsak tum a ni.
Sorkarin heti zawnga hma a lak chhan chu, Champhai Leilet area-ah in sak leh thil dang atana hmalakna, sorkar phalna ni lova kalpui a tam bakah, Lo neia eizawng te hmakhaw ngaih vang niin sorkar thuchhuah chuan a tarlang a. Hetia hmalak a nih loh chuan nakin zelah loneitute tan eizawnna tur hmun a awm loh hlauhthawnna vang a nih ber thu a tarlang bawk.