KHAWVEL FINNA RAWNGBAWLNA HMANRUAA HMANGIN
(Pulpit leh politics rilru ah awm tel se)

  • Debbie Rinawmi

Pathianin kan chhehvela thil thleng hrang hrang te hi a ram lakna hmanruaa hmang turin helai hmun ah hian min dah a, chuvangin kan ngaihven a, remchang kan zawn a tul hle a ni.

L.Keivom chuan a lehkhabu Zoram Khawvel 4 ah chuan Mizo te van atanga tla a, helai hmuna lo awm ve tawp hi kan ni lo va; kan hnam zia leh nunphung hi Pathian pek a ni tih thu a tar lang a. Kristianna a lo luh atangin kan hnam nunphung ah a bet nghal a, chuvangin politics leh sakhuana hi Mizo te nun langsar ber a ni ti ila kan sawi sual kher lo vang. He mi a nih avang hian politics leh sakhuana inzawm tir leh inzawm tir loh chungchang ah kan buai hle a. Pulpit atanga ram inrelbawlna sawi te hi thenkhat ngaihdan ah chuan thil thiang lo a nih rualin thenkhat ngaihdan ah chuan tih awm tak te pawh a ni bawk a ni.

Engpawh nise, pakai leh lawk ila. Khawvel politics sawi nikhuaa sawi hlawh leh lar em em chu Hegemonic Stability Theory hi a ni. Kum 1945 atang daih tawh khan American political scientists te chuan khawvel ei leh bar mumal taka a kal a khawvel ah muanna a awm dawn chuan ram pakhat chungnung fal tak a awm a ngai a ni an ti a. Chu chu he theory in a sawi tum chu a ni.

Chu chungnung fal tak chu nih duhin ram lian thenkhat te chu an hmanhlel a, indona leh buaina chhuak thenkhat te chu hei hi a chhan a ni. Khawvel hian innghahna tur leh kaihruai tu tur hi a zawng a, ram hrang hrang politics kan en pawhin authoritarian leadership style an ti a, party chhung ah a lu-ah/a chung ber ah mi thiltithei tak pakhatin a kaihhruai hi a ni. Entirna langsar tak ah chuan Russia te, China te, India ram chhung ah AAP te pawh hi an ni.

Eng kalphung hi nge khawvelin kan thatpui be rang tih ah mithiam te an inhnial luih luih reng a, mi thenkhat chuan he style hi an dah sang viau a ni. Kan pi leh pu te nun dan ngei pawh khan kan thlirlet chuan, rambuai te kha biain inthawi mahse ramhuai chungah khan a hming an hming loh pathian chungnung tak a awm niin an ngai a “pu Vana” tiin an sawi mai a, an tawngah pawh “Pathianin kan chungah zah ngai se tih te” an hmang a, vanneihna leh malsawmna an dawn chang pawh “Kan chung ah Pathian a tha a ni” an ti fo a ni.

He ta tanga lang chiang em em chu khawvel hian kawng dika kaihruai tu tur a mamawh a, Isua Krista hi kan mamawh, chu kawng dik kawhhmuh chu kan kut ah a tla ta a, chu ngei chu kan hnam din chhan leh kan mimal mawhphurhna a ni a. Chu hna chu biak inah chauh tih zawh rual a nih loh avangin tuna kan awmna hmun ah theuh hian he hna hi thawk turin Pathianin min dah a ni.

Separation of church and state an tih mai hi kum zabi 18-naa French Revolution in a hrin chhuah a ni a, khawvel ram hrang hrang ah a lar hle a. Sakhuana leh ram inrelbawlna pawlh loh ti te pawhin a sawi theih awm e. USA Supreme Court chuan kum 1962 daih tawh ah khan sawrkar sikul ah naupang te zing tawngtaina sawitir an lo khap tawh a. He ‘separation of church and state’ thlawptu te chuan mipui zalenna (democracy) tan a tha zawk a, sakhuana avanga intihbuaina awm thei a veng a ni an ti.

USA-ah khuan sakhuana vanga buaina a tlem reng em? Kum 2018-a FBI report-in a tarlan dan chuan sakhuana avanga intihbuaina hi kum 2017 ah 22% ngawtin a sang a, a zawna kum thum san lam a pan na a ni tawh a ni; kum 2020-ah ringawt pawh vawi 683 (report chin) a thleng a ni. Chuvangin, he khawvel mite ngaihdanah tha angin lang mahse, buaina a tih tlem phah chuang hauh lo a ni.

A lehlam pang thlir chuan mipui kan thuhmun a, biak in leh pawn lama awm kha mi thuhmun kan ni a, pulpit atanga sawi kha tih awm lohna a awm chuang hauh lo. Beram vengtu chuan a beram te chu thahnemngai takin khawi hmunah pawh ni se, kawng dik lova an kal peng tur ven chu a tih makmawh zawk a ni. Bible leh ringtu hmasa/kohhran hmasa kan en chuan anni pawh ram rorelna leh sakhuana hi an lo kal kawptir zel zawk a ni.

Heng zawng zawnga chiang em em chu hriatna kan hnawl thei lo tih hi a ni. Kohhran pa te zing ami Justin Martar-a te, Alexandria khaw mi Clement-a te leh midang dang pawh kha khawvel thiamna lama chungchuang tak an ni a, chu an thiamna chu Pathianin ram lak nan a hmang a, an khawvel thiamnate kha a hnawl hauh lo.

Keini pawh eng eizawnna pawh nei i la, Pathianin min dahna hmun tih hria i la; zirlai tan pawh rawngbawltu tangkai lehzual kan nih theih nana kan inbuatsaihna a ni tih hre bawk i la, heng zawng zawng chhan hi kan hriatchian chuan Pathian tana mi tangkai tak kan ni thei dawn a. Pulpit-a ram inrelbawlna sawi te pawh hi a pawi lo ni mai lovin a tul em em tawh zawk a ni.

Bible-ah hian engkim mai hi a lo awm a, Pathianin vanram kalkawng min kawhhmuhna a nih mai bakah nun dan tha min zirtirna a ni a, chuvangin pulpit atang ngeia Bible atanga ram inrelbawlna chungchang leh nun dan inzirtir hi ngaih a tha a, ngaih a ngam a, a tul em em a ni.

Leave a Reply

Your email address will not be published. Required fields are marked *

error: Content is protected !!