Lungleia chief medical officer office building, Trauma care facilities leh Type III quarters panga te chu nimin khan Health Minister Dr R Lalthangliana’n a hawng.
Health minister chuan Mizoramah healthcare infrastructure ruahman belh zel a nih tur thu sawiin, Lunglei Civil hospital complex-a Laboratory building ruahman mek pawh nakumah zawhfel beisei a nih thu leh doctor quarters tur paruk pawh zawhfel thuai a nih tur thu a sawi.
JICA kaltlanga Rs. vaibelchhe 660 project, Mizoram State Cancer Superspeciality Hospital tur pawh DoNER, Ministry of External Affairs, NITI Aayog leh Ministry of H&FW ten phalna pe tawhin, bultan thuai a nih tur thu Health Minister chuan a sawi a. “World Bank kaltlangin strengthening of health system in Mizoram project hnuaiah Rs. vaibelchhe 280 sengin Mizoram health infrastructure tihchangtlun hmalakna nikum atanga bultan pawh chak taka kalpui mek a nih thu a sawi bawk.
Technical report-a a lan danin, Trauma Care Facilities atan Rs. nuai 381 (State sorkar Rs. nuai 300, sorkar laipui ministry of H&FW Rs. nuai 81) ruahman niin, Excell Consultancy Services-in an thawk a. CMO office building atan state sorkar sum Rs. nuai 250.8 ruahman niin, ZAMZO Construction and Consultancy Services-in an thawk thung a. Type III Quarter panga atan pawh state sorkar sum Rs. nuai 178.65 ruahman niin, Brilliant Consultancy in a sak hna an thawk thung a ni.