Congress \halai huaihawtin Congress party mite chu nimin khan state health care bill ba zawng zawng July 20, 2022 hmaa pek phutin chief minister pisa tualah an pungkhawm a, chief minister hnena an phutna lehkha pek an tum chu police-in an lo dan avangin innawr buai deuh mahse, buaina liantham erawh a chhuak lo.
Congress party mite chuan chief minister chu hmaichhana hmuha a laka an thil phut hrang hrang ziahna lehkha chu pek an tum a, police hotute leh chief minister office lam chuan rem ti lovin, a secretary pe mai turin an ngen a. Chief minister office-a luh luih tum Congress mite chu police ten dangin, minute 10 vel an innawr buai.
Buaina lian zawk a chhuah hmain chief minister hmu turin Congress \halai hruaitu panga vel luhtir an ni a, chief minister hi hmuh a remchan loh avangin Secretary to CM K Lalthawmmawia hnenah ultimatum an thehlut ta a ni.
Congress \halaiin chief minister hnena ultimatum an thehluhah hian Mizoram State Health Care Scheme hnuaia damlo inenkawlna senso ba zawng zawngte chu July 20, 2022 hmaa release vek tura an phut thu ziakin, health care sum tlingkhawm leh a pung zawng zawng zat belhkhawm mipui hriata puangzar turin an phut tih an tarlang a. Chhung tina damlo apiang tana Rs nuai 2 thleng hman theih tura SEDP-a sum dah vek tawh chu a awmna sawia engzatnge dah a nih mipui hriata puangzar tura an phut thu pawh ziaklangin, MNF sorkar hmasa anga health care sum chu mimal hlawkpui tura bank-a an dah leh dah loh sawi chiang tur leh Congress sorkar hmasa sum lo dah Rs. vaibelchhe 122.39 chuang sawihnawma cheng khatmah dah lo anga dawt a sawi kher chhante puang tura an phut thute an ziak a ni.
Secretary to Chief Minister hnena ultimatum an thehluh hnu hian Congress \halai President Dr. Lalmalsawma chuan chief minister-in a hmuh ngam loh avangin a secretary hnenah ultimatum chu an thehluh tak thu leh an thil phutte chu a tihhlawhtlin hma chu um zui zel an tum thu sawiin, mipui thlavang hauha an punkhawm chu a bul\anna chauh a ni a, health care scheme chungchanga sorkar hmalakna chu thlir zui zel an tum thu a sawi bawk.