Serchhip district disaster management authority (DDMA) chairman, District Bawrhsap Nazuk Kumar-i’n nimin khan ruahsur nasa avanga Serchhip leh a chhehvela leiminna hmun te a tlawh.
DDMA chairman chuan Chhiahtlanga NH54 by-pass road retaining wall chim te, Serchhip leh Chhiahtlang inkara kawnga leimin te, Serchhip P&E venga leimin te, Serchhip Dinthar venga NH54 tlahniam te leh Dinthar Veng hmun thenkhat panna leiminin a hnawh te, Darnam venga Telecommunication tower panna kawng laihna leivung tawlhin NH54 a hnawh te bakah leimin vanga in thiah te, Sailiamkawna Horticulture deptt. warehouse leh Cold storage sira leiminin an power line a tihchhiatte, warehouse building dinhmun himlo deuh nia langte tlawhin a enfiah a ni.
Serchhip leh a chhehvela ruahsur avanga harsatna thleng tam zawk chu NH54 zauh hna thawh mekin a nghawngte an nih avangin Serchhip Bawrhsap chuan NHIDCL hotute chu a rang lama thianfai turin a hrilh a. Invenna hna thawh theih ang angte pawh a ranglama umzui a nih tur thu sawiin, Horticulture department warehouse bik chu Horticulture hotute nena hmalak zui zel dan tur sawiho a tul tur thu a sawi.
DDMA chairman hi Addl. DC Lalmuansanga Ralte, SDPO Kaste Romalsawma, SDO (Sadaar) Lalzikpuii, DM&R District organiser Vanlalduhi Ralte ten an tawiawm a. NHIDCL hotute leh an hnuaia contractor te leh mi pawimawh dang te an tel bawk.