Silchar-ah ni hnih lai ruah sur tawh lo mahse, Tuiruang (Barak) lui lianin Silchar khawpui a tibuai zual zel a, Mizoram house a chim thui viau tawh a, Mission compound lam pawh la phek buai chiah lo mahse, an buai tawh viau.
YMA, Silchar branch president K Vanlalhriata’n The Zozam Times a hrilh danin, Tuiruang lui lianin Silchar khawpui a chim buai tawh hle a. Khawpui chhungah lirthei hmanga inkalpawh theih a ni tawh lova, hei hian lirthei hmanga Mizorama mamawh phurhluh pawh a tikhaihlak tawh a ni.
Silchar lamah ni hnih lai ruah sur tawh lo mahse, Tuiruang fintu lui hrang hrang te ruah surin a tih len nasat avangin Tuiruang lui chu a lian chak hle niin Silchar YMA president chuan a sawi a. Tuntum anga Tuiruang lui a len chak hi an la hre lo hial niin a sawi.
Nimin tlai lam khan Mizoram house-a thawktute chu inchhawng sang lamah an awm a ngai tawh a, kawta lirthei an dah te pawh tuiin a chim pil deuhthaw tawh niin Silchar YMA president chuan a sawi a. “Mission compound lam pawh Mizoram house lam ang em chuan la buai lo mahse, buai viau thei dinhmuna kan ding a, kan inralrin reng” a ti.
Tuiruang lui lian kam hun tur sawi theih a nih loh thu sawiin, a fintu lui hrang hrang awmna lamah ruah a la sur zel chuan Silchar lamah ruah sur tawh lo mahse, Tuiruang lui chu la lian zel thei a nih thu a sawi a. Silchar leh a chhehvela Mizo awm te chanchin a theih ang anga an ngaihven thu leh harsatna tawk nasa zual an awm a nih pawha chanchin inhrilh tawn rang tura an inchah thu a sawi bawk.
Tuilianin eng ang chiahin nge kawngpui a tihchhiat dawn hriat a nih loh avangin tuilian a kam hnuah pawh engemawchen chu lirthei veivak a khaihlak thei niin Silchar atanga thudawnna pakhat chuan a sawi bawk a ni.