ZPM vice president Dr. Kenneth Chawngliana’n “Thutlukna mumal siam ngam lo sorkar kan hrawn mek” tiin, “Mahni inphenna atana pawl hrang hrang ngaihdan kan khawnkhawm awl lo mai te hi a vanduaithlak hle” a ti.
Nimina ZPM party chhung inkhawmah he thu hi ZPM vice president Dr. Kenneth Chawngliana chuan a sawi a. Dan kenkawh kawngah Mizoram sorkar chu a hlawhchham chiang hle nia sawiin, “Mipui kan that em avangin buaina lian zawk kan la pumpelh hram hram niin a lang” a ti.
Thil thleng hrang hrang ngaihtuahin Mizoram mamawh chu kalphung thar – mipui sorkar a nih thu Dr. Kenneth Chawngliana chuan a sawi a. Thlei bik nei lova rorelna, dan ngaipawimawha a taka hma la ngam, huaisen taka thutlukna siam ngam sorkar siam turin ZPM chu a inbuatsaih mek niin a sawi.
ZPM vice president chuan, kum 30 chuang party pahnih atangin chief minister leh party president ni kawp ve ve ten tih dan thar, hmasawnna thar awm lovin Mizoram an kaihhruai tih sawiin, “Sem policy kalpuiin chu policy chuan mipui min tibeidawng hle a, hmasawnna liantham hmu mumal lovin tun sorkar pawh hi kan thlahliam leh dawn ta a ni” a ti.
Mizorama sorkar awm tawhah party mi hleihluak taka induhsakna a hluar hle niin Kenneth Chawngliana chuan a sawi a. “Nawmchenna leh mahni inhaivurna sorkar hi langsar taka kan hmuh thin a ni” a ti a. RTI hmanga zawhna chhanna atangtein thil diklo tam tam hmuh ni thin mahse, thil diklo titute hrem an nih thu erawh hriat a khat hle tih sawiin, hna lak chungchangah induhsakna uchuak a awm reng thu leh dan lova contract inpek leh hnathawh thalo langsar tak tak te chu Zoram titi a nih mek thu a sawi.
Kalphung thar chungchang sawiin, Kenneth Chawngliana chuan “Kalphung thar – Mipui sorkarah chuan kan hruaitu thlanchhuahte tan nawmchen a rem dawn lova, lal hrawt tur ni lovin hnathawh kawr haa hnathawk tak tak turin kan beisei dawn” a ti a. “Mizote hi hnam induh tak, mahni tawka intodelh leh midang puih ngaia awm pawh hre ngawih ngawih thin ni mah ila, tunah chuan hnam intodelhlo kan ni mek a, hnam huaisen ni thin kha huaisen thei lovin kan awm mek” tiin, “Kan nihna pangngai, kan ze pangngai nei let leh turin sorkar tha kan neih a ngai a a ni” a ti bawk.