Ruihhlo leh a kaihhnawih te laka India ram a fihlim theihna tura sorkar laipui hmalakna ‘Nasha Mukh Bharat- Drug Free India Campaign’ kalpui chungchanga Champhai district committee chu nimin khan an chairman, Champhai Bawrhsap James Lalrinchhana hovin an thukhawm a. Coordinator cu drug awareness campaign kalpui dan tur leh campaign team te siam turin an ruat.
Zirna in middle school atangin ruihhlo ti lo tura inzirtirna kalpui ni se, an ti a. Kumtlinglo school kal tawhlote, raltlan camp leh district jail-ah te inzirtirna neih ni se an ti.
Tun thla ni 27-a International day against drug abuse & illicit trafficking hman dan tur pawh sawiho nghalin, Bawrhsap hova Govt. Champhai college-a hun hman zawh hnuah a a thawhkhat nan khawpui chhunga zirna in 11 ah te drug awareness campaign neih ni se, an ti a. Resource person tur te an ruat nghal.
Nasha sub-committee/team paruk – Committee for fine policy at government office; Drug treatment facility monitoring team; Sale of tobacco/cigarette monitoring team; Drug control sub-committee; Sale of drug monitoring team leh Public participation sub-committee-te siamin, District level nasha mukh bharat abhiyaan committee thutkhawm apiangin an hmalaknate report thin turin an ti bawk.
Champhai Bawrhsap chuan ruihhlo leh a kaihhnawih laka fihlim thei tura theihtawp chhuaha tanlak a tul thu sawiin, Champhai district-a ruihhlo hluar zel tur dova beileta tha thlah lova tanrual a tul thu a sawi a. Ruihhlo do kawnga hmalakna dang district level narco coordination centre (NCORD) committee nena kalkawp thiam a pawimawh thu pawh sawiin, tum leh beih thuhmun an nih avangin thahnemngai taka thawhho zel a tul thu a sawi.