MNF Adviser, Minister of state ni bawk Robert Romawia Royte-in an hotu ten an sawi ang zelin SEDP a kal nia sawiin, Vawk vulhah phei chuan Rs nuai 3 dawng kim tep pawh an awm tawh niin a sawi.
He thu hi nimina MNF party chhung inkhawmah Robert Romawia chuan a sawi a. “SEDP hi party body ni loin, dan ang thlapa sorkarin inkhaidiat fel taka a din committee ten a dawngtu tur te an
thlang,” a ti.
SEDP sem a nih ring lo ten an hnar an hmu lian mek nia sawiin,
dawn loh hlauah an tang ta zawk niin a sawi a. Hei hian party dang te a sawithiat mek niin a sawi.
State changkang leh hmasawn zawkte dinchhuahna bul pakhat chu external loan a nih thu sawiin, Robert Romawia chuan “Tuna ADB sum central sorkarin min puksak tur hi thil ropui leh lawmawm a ni a. Nasa takin Mizoramin kan that phah dawn a, kan leiba punna aia kan dehchhuah punna a san phah zawkna tur a ni ang,” a ti.
GSDP growth rate aṭanga chhutin Mizoram leibat tlem ber lai chu Chief Minister Zoramthanga hruaina hnuaiah a ni mek nia sawiin, state dang ten EAP an hman tangkai dan ang chu zir ve zel a tul tih a sawi.
Robert Romawia chuan social media hman tangkai thiam a tul thu leh thudik pholan nana hman a tul thu sawiin,“Social media hmanga thubelhchiandawllo vawrh darh chingte an tlahniam zel,” a ti.
Eptu party chungchang sawiin, “ZPM te an tlahniam zel tih chu factual proof a awm a, Congress party-ah mipuiin beiseina an nei tawh lo,” a ti a. MNF party chu tunhnai election zawng zawng deuhthawah hneh taka an tlin zel thu leh party inkaihhruaina nghet leh hruaitu nghet nei party, MNF-a lut zel turin mipuite a sawm bawk.