December 2021 atanga April 2022 thengin Aizawl district-in sorkar laipui atangin MGNREGA-ah sum Rs. nuai 6483.37 a dawng a. Aizawl DRDA hnuaia block panga – Aibawk, Darlawn, Thingsulthliah leh Tlangnuam block-ah te job card 21059 awmin, hna 2390 an thawk hman.
Aizawl district development coordination & monitoring committee thutkhawm ah he thu hi tarlan a ni a. He committee hi an chairman Lok Sabha MP C. Lalrosanga leh Co-chairman Rajya MP K Vanlalvena hovin nimin khan an thukhawm a. Aizawl district-a central sorkar sum hmanga hmasawnna hnathawh hrang hrangte an thlirho bawk a ni.
He thutkhawm chungchang sorkar thuchhuahin a tarlan danin UD&PA-in PMAY-URBAN hnuaiah December 2021-April 2022 chhungin housing unit 57 an siam a, beneficiary mi 8 hnenah loan an pe. Smart city hnuaiah reverse vending machine 17 an vuah a, kawngsira tui thianghlim in tur water kiosk 24 siamin, Tourist guidance centre pali an siam bawk.
PHE department-in AMRUT (water supply) hnuaiah December 2021 – April 2022 chhungin tuikhur 20, retaining wall/fencing 6, building 5, rainwater harvesting scheme 1 bakah reservoir 7 an siam a. PMGSY hnuaiah PWD-in Aibawk, Darlawn, Phullen, Thingsulthliah leh Tlangnuam block huam chhungah a belhkhawmin kawng km 74.67 a thui an sial zo.
Samagra Siksha, Aizawl district-ah Primary school 219 leh Middle school 165 tuamchhuakin zirlai 14324 hnenah uniform grant pekchhuah a ni a, Primary school zirlaite tan a thlawnin zirlaibu 9284 an semchhuak a. Middle school zirlaite tan a thlawnin zirlaibu 7424 an semchhuak. Mid day meal-ah Primary school 230 leh Middle school 195 tuamin, kitchen 16 an sa thar bawk.