Sipai lakna: Mizorama sipai bângte pawhin tha an ti lo

India sorkarin sipai lak dan tur kalphung thar a siam, ‘Agnipath’ chu dodalna a nasa hle a, sipai bâng inzawmkhawm, Mizoram Ex-Services League (MESL) pawhin scheme thar hi tha an ti lo.

Sipai lakna thar scheme thar kaltlanga kum 17 leh chanve leh kum 23 inkar sipaia lakte chu kum li an tan hnuah chawlhtir an ni ang. Hei tak hi MESL-in he scheme an duh loh chhan chu a ni.

MESL hruaitute chuan kum li sipai an tan hnua pension pawh nei loa chawlhtir an ni tur chu tha lo an ti a, anni chuan sipai tan hun kalphung hman lai, kum 17 an tan hnua pension-tir chu an duh zawk thu The Zozam Times an hrilh.

Agnipath scheme thar duan a nih hma hian an ngaihdan, ‘Kum reilo te sipai intantir’ an duh loh thu leh ‘sipaia kum 17 an tan hnua pension-tir thin’ chu la kalpui an duh thu chu chief of army staff hnenah Indian-Ex-Services League (IESL) kaltlangin ziaka an lo thlen daih tawh thu MESL hruaitute chuan an sawi.

Tuna scheme thar duan a nih hma pawhin services rules angin sipaite chu kum 35 atanga 45 inkar an nih laiin pension tlem pein chawlhtir thin an ni a, hei pawh hian nghawng tha lo a nei tih MESL hruaitute chuan sawiin, “Kum la valai takin an pension a, eizawnna kawng an dap chawpte a ngai leh thin a, ex service zingah pawh harsa tak tak an awm,” an ti.

Sipai lak dan thar scheme hi hman a nih hnuah phei chuan la thalai tak tak hlawh lo nei tawh thin, hna zawng thar tur an awm dawn nia a lan thu MESL hruaitute chuan sawiin, hei hian nghawng tha lo zawk a nei thei nia an hriat thu an sawi.

MESL hruaitute chuan an pawlah sipai bâng 2,000 dawn an awm mek a, chung mite tana sorkar hna laka reservation siamsak chu sorkara an phut a nih thu an sawi a, tuna sipai bângte harsatna tawh thlir chungin kum li hnua sipaia inchawlhtir chu tha an ti thei lo tih an sawi.

He scheme thar hi tha ti lo mah se dodalna lantir zawnga hmalak an tum loh thu an sawi a, “Dodal tumna kan nei lo a, han tih vak pawhin awmzia a nei tawh chuangin kan hre lo,” an ti.

Covid-19 leng avangin kum hnih vel sipai lak rûnpui neih a ni tawh lo a, hri len hma khan Mizoramah kum khatah tum hnih vel sipai lak rûnpui neih thin a ni a, tum khat rally-ah sipai tan tum thalai sang rual zet an intlar thin a ni.

Tar lan tawh thin angin, sipai lakna thar scheme thar, Agnipath hi June 14, 2022 khan tlangzarh a ni a, he scheme kaltlanga kum 17 leh chanve leh kum 23 inkar sipaia lak, ‘Agniveer’ tihte chu kum li sipaia an tan hnuah chawlhtir an ni ang a, pension erawh an nei dawn lo.

Agniveer zinga zaa 25 chauh chu sipai ngheta lak leh tur an ni a, Agniveer-a tangte chu ministry hrang hranga an luh theihna remchang siamsak an ni dawn a ni.

He scheme thar hi India ram hmun hrang hranga thalaiten an duh lo hle a, lungawi lohna lantirin buaina a chhuah phah nasa hle a ni.

Agnipath scheme hmanga sipai lak rûnpui chu July atangin neih tan tum a nih thu sorkar laipuiin a puang tawh a, heta intlar turte hian scheme duh lohna lantirnaa tharum thawhna leh pawikhawihna thlenaahte an inhnamhnawih lo tih certificate, police-in an hriatpuina an nei a ngai dawn a ni.

Leave a Reply

Your email address will not be published. Required fields are marked *

error: Content is protected !!