Tuilian leh chhiatna karah kawng awlsam zawn a hun hle
Ruahsur nasa avangin tui lian a awm a, kan ramah ngei pawh khuarel chhiatna kan tawh phah nasa hle. Inkalpawhna kawngpui a hnawh a, harsatna kan tawh ang angte a theih chinah chinfel ni ve bawk mah se, ruahsur a reh mai lo a nih chuan a aia nasa zawk la tuar thei reng kan ni bawk.
Hetiang hi kan ram dinhmun a ni a, hetih lai hian kan eitur chawkluhna kawngka ber pakhat Silchar lamah pawh tuilian vangin harsatna a thleng nasa a, lirthei chetvelna thlengin a buaiphah hle.
Chawhmeh leh thil man a to tan a, a rawn thleng chhunte pawh hlui tawh leh thar lam lutuk lo a ni tlangpui bawk. Ruahmanna siam thuai thuai a tha hle.
Kan eitur leh mamawh lakluhna kawngka ber hi Silchar lam a ni miau a, harsatna kan lo tawk deuh a nih pawhin sorkar hian ngaihtuahna hmang zung zung mai se la, harsatna a awmin a tuartu chu mi rethei zawkte bawk kan ni leh si hi tih reh dan a zawn vat vat a tha awm e.
Tripura kawng pawh a tha tawk em em a, state dang nena kan inkalpawhna kawng dang pawh tha deuh deuh a awm. Remchang dang dap chunga ei leh bar a ni emaw, oil chungchangah a ni emaw, kawng awlsam a zawn thuai thuai hi a tul hle tawh a ni. Chuti a nih loh chuan hmasawn lo zia, buaina ngai bawka buai reng kan la ni fo in a rinawm.