Aizawl : ZPM thalaiin “Pathian leh kan ram tân titu inti MNF kaihhruai sorkar rorelnain Bihar-a Laloo-a vanglai a ang tual tualah kan ngai” an ti a. Hei hi secretary-te hna chanpual siksawi kawngah chiang takin a hmuh theih niin an sawi.
ZPM thalai chuan “Restricted tender chhuah kawngah a duhthala a chet theih loh vang em ni, tih theih turin secretary-te hna chanpual siksawi kawngah Chief Minister-in Chief Secretary hremin, department tenau a chan tir a, Chief Secretary chan tur awm tak pawh a chantîr lo niin a lang” an ti a. Hei hian Chief Minister Zoramthanga rorelna chu Laloo-a rorelna ang maia mumallo leh mi ṭhenkhat dahthatna sorkar a nih zia a tarlang chiang hle niin an sawi.
Secretary hna chanpual siksawi kawngah department dangah pawh an nihna leh an hna chanpual inmillo tak tak a awm nual niin ZPM thalai chuan an sawi a. Zoramthanga kaihhruai MNF sorkar chu thil dang zawng aia ram leh hnamthatna tur ngaihtuah tur leh sorkar kalsual tur vengtute hnawk tia dahtha mai lova, kawng dik zawh phahna atana hmang zawk turin thurawn an pe tih ZPM thalai chuan an sawi bawk.