Aizawl : Principal Magistrate Renee Lalremsiami Hmar hoin nimin khan Serchhip District Jail Inspection team chuan Serchhip District Jail an tlawh a, kum 18 hnuai lam tang an awm lo tih an finfiah.
Serchhip District Jail Inspection Team-in Chhiahtlang chhuah lam liama awm Serchhip District Jail tlawhin, tan ina tang mekte nen inkhawmna hun tha tak an nei a. Tang mekte hian an hriselna dinhmun pawh a that thu an lo hrilh.
Renee Lalremsiami chuan tan ina tang te zinga thubuai lian zual neite chu Central Jail, Aizawl lama thawn a tul thu te, sorkarin ukil rawih man ngai loa ukil a dahsak thu te, thubuai nei chuan a rang lama ukil neih vat a finthlak thute, tuna sorkarin zu khapna dan a kalpui mekah hremna a nat avanga zu kaihhnawiha thubuai neih chu case dang ang bawka a hlauhawm tawh thu te a sawipui a ni.
Principal Magistrate hian tang vengtute’n tawngkaa mamawh an lo thlen Futsal ball pek dan kawng dapsak an nih tur thute a sawi bawk.
Tun dinhmunah Serchhip District Jail-ah hian mi 51 tang an awm mek a. He’ng zinga panga chu hmeichhia niin, an zinga pakhat chu fa pawm lai nei a ni. Tang zingah court in thiam loh a chan tir tawh (convict) mipa 13 leh hmeichhe pakhat an awm mek a. Foreigners act-a tang pakhat a awm bawk.
Principal Magistrate hi C. Lalhminghlua, President, MJA Serchhip Dist leh Saizikpuia Sailo, Legal-cum-Probation Officer, DCPO Serchhip te’n tawimawmin, Laldingliana Chinzah, District Jail Superintentent leh Jail duty te’n an lo dawngsawng a ni.