Table Tennis a khelh thiam avanga hriat hlawh tak, hmabak êng tak nei, Lalrinpuia chu bum a nih avangin ruihhlo kaihhnawihah kum li chuang jail bang a zut tawh a, tun hnaiah a thlawna ram danga zin tura thlem chhuah, ruihhlo an kentir Mizo pasarih man an ni leh tawh.
Tun hnaiah senso tumsaka pawisa hlawha ram danga zin tura inthlemna thanga awk an awm ta fo a, tawktarh duhawm tak hmanga mi thlema ruihhlo kentir thintute hi Mizo tho an ni.
May thla tawp lam khan South Africa leh Rwanda atanga India rama lut Mizo pasarihte chu Bangalore airport-ah ruihhlo tam tham tak mansak an ni a, heng mite hi a thlawna zin tura thlem chhuah niin Bangalore Mizo Association (BMA) thuchhuahin a tar lang.
BMA thuchhuahin a tar lan danin ruihhlo thahnem tak an mansakte hi Aizawla khawsa hmeichhe pakhatin an zinna senso a tumsak a, zin tura sawmtu hian India ram an pan leh hnuah bungrua a kentir a, chung chu ruihhlo thahnem tak lo niin, Bangalore airport-ah custom-in an lo man ta a ni.
Human trafficking leh smuggling kaihhnawih a mi buma sumdawnna kalpui thin nia hriat Mizo nu hian Mizoram lama mi harsa zawkte leh chinchang hre tlem deuhte chu pawisa nena thlemin ruihhlo a tawlhtir thin niin BMA thuchhuah chuan a tar lang a, a tirhte hian ruihhlo/damdawi an hawn dawn tih an hre lawk ngai lo nia thu an dawn thu an tar lang.
BMA thuchhuah chuan hetiang buaina tawkte hi Mizo association-te tan buaipui emaw, tanpui emaw an har tih sawiin, thuneitute lam hian a inhnamhnawih nia an hriat apiangte an man tel zel avangin fimkhur a ngai hle tih an sawi bawk.
Mahni Mizopuite bum thin nu hian hetianga sumdawnna a kalpuina hi a rei tawh nia hriat a nih thu The Zozam Times thudawnna chuan a sawi a, state pakhata Mizo welfare chuan a thlalak nen inthawn darhin mi hlauhawm a ni thu leh a laka fimkhur tura mipui an ngenna pawh an lo tichhuak tawh niin a sawi.
Hetianga inbumna avang hian Mizo tam tak chu state hrang hrang jail-ah tang an awm mek niin thudawnna chuan a sawi a, “Kan hriat danah mi thenkhat chu an chhungten khawi jail-ah nge an tan an hriat tawh loh, an chin an hriat loha bo mekte pawh an awm,” an ti.
Thudawnnain a sawi zel danin hetianga bum tawkte hian Mizorama an awm laiin bum an nih tih an inhre lo a, ram pawn an kal hma, India ram chhunga intawhkhawmna tur hmuna an mahni thlemtuten an ruat an thlen hian an zinna senso tumsaktute hian lunghlu an rawn hawn tel a tul thute an hrilh a, thenkhat phei chu ruihhlo an hawn haw a tul thute pawh an hrilh hre tho nia thudawn a ni.
An zinna sum sensaktuten dan phal loh an ken a tul thu an sawi hnu pawha zin luite an awm rualin thenkhat chuan harsatna lian zawk an tawh hmaa ram pawna zin ta loa Mizoram pan leh tate pawh an awm niin thudawn a ni bawk.
Tar lan tawh thin angin, TT khel thiam, Lalrinpuia leh a thianpa chu December, 2017 khan Mizo nu pakhatin a senso a tumsak tura a thlem angin Mozambique, Africa-ah an zin a, India ram an pan lehin a zinna senso tumtu thurualpui bungrua a hawnsak chu ruihhlo thahnem tak niin, Mumbai airport-ah man an ni a, kum li, thla thum leh ni hnih Taloja Jail, Mumbai-ah a tan phah a; he thubuaiah hian thiam a chang tawh a ni.