AIZAWL: Land Revenue & settlement minister Lalruatkima hovin Revenue department hotu ten nimin khan Mizorama stamp duty lak tur zat bithliah ennawnin, rate thar tur an sawiho a. “A tul anga sorkarah hmalak chhunzawm ni se” an ti.
Revenue Minister chuan tun dinhmuna stamp duty lak mek chu chhan hrang hrang avangin ennawn a tul tih a sawi a. Mipui nghawng nasa si lo leh sorkar tana tha tho si, hmasawnna thlen tur ni bawk si ngaihtuah a ngai tih sawiin, stamp duty bakah mutation fee leh registration fee te pawh ennawn a tul thu a sawi bawk.
Ram neitu (pass holder) hming thlaknaa pawisa chawi ngai -mutation fee- siamthat chungchang leh deed hrang hrang siamna a registration fee siamthat chungchangte pawh Minister hova thukhawm hian an sawiho a. Mipuiin deed hrang hrang an siamin sorkara register a pawimawh tih hi hria se an duh thu leh zirtirna uar zawka kalpui pawh tula an hriat thu sawiin, ruahmanna an siam nghal.
Minister hova thukhawm chuan lirthei hralhna, thurochhiah, ram/ inhmun etc. inhlanchhawn leh thil dang danga deed siamin register zel chu a hnu zela harsatna awm thei lakah a him a ni tih hriain mipui ten ngaipawimawh se an duh thu an sawi a. Revenue department kaihhnawih thilah sorkar dan dinglaiin a phalsak ang- in mipui tana phurrit a awm loh nan deed writers license siama, hemi neite hnenah chauh deed ziah phalsak a that thu leh mipui tana na lo tura a fee pawh bituk tha an tih thu an sawi bawk.
Sorkar thuchhuahin a tarlan danin, ram lei leh hralh a niha ram neitu an inthlakin the Indian stamp act, Mizoram amendment hnuaiah stamp duty pek a ngai a, he stamp duty hi a ram awmna leh a hmanna ram azirin rate hrang hrang siam ni thin chu rate hrang hrang awm lo turin kum 2016 khan he dan hi siamthain, rate chu 2% a dah a ni a. Hei hi ennawn ngai awma hriat a nih avangin he dan siam thar pawh hi hman a ni ta rih lo a ni.