Afghanistan-a doctor-te chuan Nilainia lirnghing avang khan naupang tam tak an thi tih an sawi.
Lirnghingah hian mi 1,000 chuang an thi a, ruah tam tak a sur zui bawk avangin tlangram khawkrawk tak tak leh hmanraw that lohnaah chuan chhanchhuah hna thawh a chak lo hle.
Magnitude 6.1-a na lirnghingin hluma sak in tam tak a sawi chimin mi engzat chiah nge a chhilh hriat theih a ni lo.
Taliban thuneitute chuan dam dang puihna an mamawh tak zet tih an sawi a. Inbiakpawhna a chhe nasa hle bawk tih an sawi.
“Chhiatna thlenna hmun tam tak kan la thleng thei lo va, network a chhe em em bawk,” tiin Taliban thupuangtu chuan a sawi tih Reuters chuan a tar lang.
United Nations pawh tawmhulna tur lailawk leh puihna dang pek tumin che mah se an tum angin an thleng thei bik lo va, a bikin a tuar na ber, hmun kilkhawra awm, Paktika province an la pawh thui thei lo.
Rei tak ram buaiin a chim tawh avangin Afghanistan-a damdawi inte chu a hma atang tawhin a chhe em em sa a ni.
A intanna bula khuaa dam chhuak leh chhanchhuah hna thawktute chuan khaw tam tak a puma chhia a awm tih BBC an hrilh a, kawng leh mobile phone tower a chhe nasa hle a, thi zat pawh an pun rin a ni a. Mi 1,500 vel hliam tuar an awm bawk tih thuneitute chuan an sawi.
Thi tam ber hi Paktika-a Gayan leh Barmal district-a mite an ni a. Khaw tam tak chu a chhe vek niin an sawi.
Paktika khawpuia damdawi ina awm nu pakhat chuan a chhungte mi 19 zet a chân thu a sawi.
“Pindan pakhata mi panga, a dangah panga, a dangah pali, a dangah pathum, ka chhungte zawng zawng an thi vek a ni,” tiin damdawi in khuma a mutna atangin a sawi.
Dam chhuak dang pakhat, Shabir chuan, “Min la sawiin ka hria a, ka khumte pawh la nghingin ka hria,” tiin BBC a hrilh.
“Ceiling a lo tla a, ka tang a; mahse, van ka hmu thei a. Ka dar hian engmah a hre lo va, ka lu a na em em a, ka chhuak thei ta hlauh thung a. Pindan pakhatah ka chhungte pasarih emaw, pakua emaw an awm a, an thi vek a ni,” a ti.
Kum 20 chhunga lirnghing an tawrh nat ber thleng hi Taliban sorkar tan chuan chona lian tak a ni mek a, nikuma khawthlang ramte puih mipui sorkar a tluk hnuah thuneihna an chang a ni.
Lir hi Nilaini zing khaw var hma khan Khost khawpui atanga km 44 vela hlaa intan niin Pakistan leh India pawh a sawi tel.
Afghanistan hi eibar leh sumah an pachhiat lai a ni a. Taliban sorkar hotu lian, Abdul Qahar Balkhi chuan mipuite hi an mamawh anga pui turin sum an nei tawk lo tih a sawi.