Spanish club Atletico Madrid chuan Thomas Lemar chu hralh an phal a, an hnena contract a neih rei tawh loh avangin lalut duhtu an awm chuan an dilna an ngaithla dawn.
Kum 26 mi French winger hian AS Monaco atangin kum 2018 khan Spain khawpui hi Euro maktaduai 72 in a zawm a. A man a tam ang hu in Rojiblancos in a laka beisei an neih ang chu a tak ramah a chantir thei lo.
Thla 12 chiah a contract-ah a awm tawh a, hei vang hian Atletico Madrid hian a man an tel theih laia hralh mai an duh.
Rojiblancos hian Covid 19 hripui kaihhnawih avanga sum an hloh ve tho avangin an sum dinhmun siamthat an mamawh a. UEFA hnuaia Financial Fair Play dan zawm thei turin sum hmuh an mamawh.
An stadium Wanda Metropolitano sponsor-na tur tihfel a ni thuai dawn a, mahse heti chung pawh hian player hralh an ngai.
Right-back leh midfielder thar an zawn mek avangin player an kawllaite chhuahtir a inpaih thawl phawt an mamawh.
An tana match 143 atanga goal 9 khung a assist vawi 14 nei Lemar hian contract hniam zawk ziah a duh loh avangin hralh an huam a. Nimahsela kum khatah Euro maktaduai 7 a hlawh avangin ani lalut duh tura inseng ngam an awm rih loh hmel hle.