Bangladesh-a thuneitute chuan an rama tui lian a kâm tan mek laiin tui atanga natna insiam theih a len hlauvin an an bei zui leh mek a. Tui lianin a dan tangkhante hnena tui in tur thianghlim pek hna an thawk leh mek.
An ram hmun lia thena hmun khat lai tuiin a chim hman avangin chhanchhuah hna thawktu team 2,000 dawn chuan district 64-a 17-a a tuartute hnenah tui leh an mamawh dang pein an thawk chhuak tih Disaster Management Department Director General Atiqul Haque chuan Ningani khan Reuters news agency a hrilh.
“Tui lian a kâm tan a, hri leng thei a ni mek thung a. Tui thianghlim a tam tawk loh chuan tui atanga hri insiam a len mai kan hlau hle,” tiin Haque chuan a sawi a. “Tui in tur thianghlim pek hi kan thupui ber a ni,” a ti.
Directorate General of Health Services (DGHS) chuan Nilaini khan tui a len hnuah June 18 atang khan tui atanga insiam natna kai mi 3,400 chuang an awm tawh niin a sawi.
Kum 100 chuang hnua Bangladesh-a tui a len nasat leh berah hian mi maktaduai 4.5 chuang tangkhangin mi 42 an thi.
UN hnuaia children agency chuan mi maktaduai li chuang, naupang maktaduai 1.6 telin, Bangladesh hmarchhakah hian tui lian avangin tlawhpawh theih lohvin an awm niin a sawi a, tui in tur thianghlim an neih bawk si loh avangin tui atanga natna hri insiam theih an kai a hlauhawm hle niin a tar lang.
Asia chhim lamah hian June leh October inkar hi fur niin ruah a tamin tui pawh a lian nasa thin a; a bikin hmun hniama awm, Bangladesh chu a tuar na an ni thin.
Kum dangah pawh ruah tamin tui lian nasa thin mah se sik leh sa lama mi thiamte chuan a inthlak nasa a, a thawk na tawlh tawlh niin an sawi.