Chawlhkar khata chocolate tlawn khat vel ei thinte hi a ei ve miah lote aiin, lung na an neih-na chance 37% in a hniam bik, an ti a ni.
Chocolate a awm heng Flavonoids, Methylxanthines, Polyphenols, Stearic acid te hian Lungin chhiatna a thlen mai theihna lakah an veng a, taksain a ngeih tak mai (Good Cholesterol or HDL cholesterol) a tipung ve thung.
European Journal of Preventive Cardiology pawhin chocolate ei hi Lungin a ngeih thu an sawi a, mahse engtia ei tur nge, eng anga ei tur nge tih lam erawh chiang taka sawi emaw, inkaihhruaina emaw an sawi lem lo.
A tlangpui thuin tawngpaw ei uar erawh an sawi uar lem lo theuh va. Chocolate kher lo pawh, eng pawh hi a lutuka tih chuan a tha lo vek tih hi hria ila. Fimkhurna tur, doctor te’n an sawi bawk.
Chocolate thatna kan sawi rualin, calories leh sugar level a tihsan theih avangin Zun-thlum / thisen thlum neite tan erawh ei loh deuh mai pawh a sual lo mai thei. Midang aia fimkhur deuh a tul thu an sawi a ni.
Chocolate hian lung lam chauh ni lovin taksa peng dang tan pawh thatna a thlen nual mai:
Tannin an tih biochemical a awm avangin hahni tan a tha.
Thisena cholesterol a tihniam.
Min titar hmâ thei, cell chhe tawhte thenfainaah a tangkai hle bawk a; chuvangin mi a lan notir thei a ni (taksa leh vun a nonal tihna a ni ber).
Stroke, thisena thau tam leh ruh hrisel lo (ruh vung adt.) tan pawh a tangkai hle bawk;
Neuroprotective Function an tih mai, Thluak hnathawh tithatu a ni bawk.
Rilru zuai (stress) a tizangkhai thei a, taksa na te pawh a chhawk zangkhai pui hle thei.
Nupa inkarah inpawl châkna / thathona (drive) a tisang thei bawk a ni.
Hengte bakah thatna dang dang a la nei nual a ni awm e.
Chocolate ah hian caffeine a awm ve a, Lungin a haw viau dawn lawm ni, tiin in zawt mai thei a. A dik. Mahse, Chocolate-a awm caffeine hi Lungin a ngeih loh tur khawp chuan a tam lo.
Chocolate eiin Lung a tih hrisel zawk dan scientific taka an proof, hetiang hian kan sawi ang e.
Texas State, Houston khawpuia Damdawi zirna pakhat chuan an han zir bing a. An sawi dan chuan chocolate hi kar khatah vawi khat emaw vel zel ei ila, chu chuan lung thisen zâm a tichak a ni, an ti.
Chutianga Lung thisen zâmte an lo chak vak takah chuan Lung na awm theihna chance a lo hniam phah. Coronary Arteries an tih, Lung thisen zamte hi lung chhunga thisen in kah kual vel nan an pawimawh zual hle a. Heng arteries te hi an chak a, an hrisel chuan lung na neihna chance a hniam deuh em em, niin an sawi.
Chuvangin, chithlum leh thil thlum lam chi i lei a, i ei dawn chuan chocolate hi thlang hmasa phawt mai thin la a tha viau mai thei. Ama’rawhchu, kan sawi tâk ang khan nitin emaw, zing deuh taka ei erawh a tul lo vang chu.
Thil pakhat, pawimawh em em a la awm bawk e. Chocolate hmingpu ei tur chi hrang hrang a awm a. Chocolate dik tak kha ei tur a ni. Chutiang thlan thu-ah fimkhur a ngai hle bawk awm e.