Season a hman that em avangin European football a player ngaihven hlawh ber zingah a invawrh a, mahse RB Leipzig forward Christopher Nkunku chuan club chhuahsan dawn rih lovin Bundesliga a khel zel turin contract a ziah belh.
France international hi hun engemaw chen atang khan Chelsea leh Manchester United ten an ngaihven nia sawi a ni nasa hle a, mahse kum 2026 thleng contract a ziah belh ta zawk.
Season liamta khan Leipzig tana ralthuam lian ber niin inelna hrang hrangah vawi 50 a inkhel a, goal 35 khungin midang khung turin vawi 19 a siamsak a. Hei vang hian Europe club liante ngaihven a hlawh nasa.
Mahse Kum 24 mi hian a hma hun Leipzig tan a thlung nghet rih ta zawk a, Bundesliga-ah hlawhtlinna sang zawk neih a la tum.
“RB Leipzig kawr ka ha chhunzawm tur hi ka lawm. German Cup kan chawi hnuah khan hmabak kan la nei tih hi ka chiang a. Hlawhtlinna neih belh zel hi kan duh.”
“Club in min chelh a tum danin min ti lawm a, ka chunga rinna an nghah avangin lawmthu ka sawi. CEO Oliver Mintzlaff nen kan inbe reng a, ani min ngaihsaknaah pawh lawmthu ka sawi.” a ti.
“RB Leipzig hian khawvel football-ah a hming a chher tawh hle a, champion turin theihna a nei tih a lantir thin. Hei hi chhunzawm a hmalam pan kan tum.” a ti bawk.
Nkunku contract neihlai hi kum 2024 a zo tur a nih chu club ten an ngaihven chhan a tling a, tunah erawh contract thar a ziah avangin lakchhuah an tum a nih pawhin a man a tlawm dawn lo.
A contract-ah hian nakkum nipuiah Euro maktaduai 65 in leichhuah theih a ni dawn a, mahse he release clause hian hman theih hun chhung a nei dawn.
Kum 2019 khan Paris Saint-Germain chherchhuah hian Leipzig hi a zawm a. Midfielder beiseiawm hi tun season-ah striker hnung chiahah nawr hma a ni a, goal hmaah a hlauhawm sawt.