Mizoram Youth Commission (MYC)-in Delhi-a IAS coaching zir tura mi 40 thlang chhuak turin ruahmanna an kalpui mekah, an sponsor-te chu prelims exam vawi hma an hmachhawm hma chuan central leh state hnuaia hna exam an phalsak dawn lo.
Super IAS 40 programme an kalpui tur chungchangah MYC Chairman Dr Vanlaltanpuia chuan nimin khan chanchinbumite a kawm a, tun tuma IAS coaching zir tur an sponsor kawngah an strict dawn hle tih a sawi.
MYC chairman chuan IAS coaching la tura New Delhi-a an tirh thlak turte chu bond sign-tir vek an ni dawn tih a sawi a, “Full sponsorship hnuaia kalte chuan prelims exam vawi hnih an hmachhawm hma chuan central leh state hnuaia hna exam phalsak an ni lo vang,” a ti.
Full sponsoship hnuaia kalte chu uluk taka an vil zui tur thu MYC chairman sawiin, an awm danin a zir loh chuan full sponsorship tihtawp leh sokarin an senso a tumsak pawh rulh lehtir dan tur thlenga intiamkamtir an ni dawn tih a sawi.
A sawi zel danin, Delhi-a IAS coaching zir tur thlanna written test chu vawiinah neih a ni dawn a, centre panga – PUC, Aizawl; JB College, Lunglei; Govt. College, Siaha; Govt. Kolasib College leh Mizoram pawna awm exam duhte tan Delhi centre-ah exam buatsaih a ni dawn.
Coaching kal tura an thlan chhuahte chu Vision IAS, LAS leh Vajiram & Ravi, IAS coaching centre-ah te an zir dawn tih MYC chairman chuan a sawi.
Zawhna chhangin, IAS coaching class kal tura senso ngai thenkhat sawiin, tuition fee chu mi pakhat tan Rs 1,40,000 atanga 1,80,000 inkarte a ni tiin, hemi bakah hian an awmna hmun tur leh ei leh in mante pawh a la ngai dawn tih a sawi a ni.
Dr Vanlaltanpuia chuan Mizo thalaite central services-a an inziah tlin theih nan sorkarin theihtawp a chhuah chungin hemi kawng hian ngaihven a la hlawh tawk lo hle tih a sawi a, “Hetianga scholarship tha hi state dang hian an ti tam lo tawp ang,” a ti.
Sorkarin sum leh pai tam tak senna tura hma a la chungin tuna exam an buatsaih turah pawh mi 575 chauh an inziak lut tih sawiin, tan lak tlan a la ngaih hle thu a sawi.
An hmalakna hi a hlawhtlinna hmuh nghal vat vat theih thil a nih loh thu sawi bawkin, an beisei angin ngaihven hlawh tawk lo mah se tun hma ai ngawt chuan a ziaawm tawh a, kum li kum nga hnuah chuan central services-a in ziak tling an awm chhoh zut tawh an beisei tih a sawi bawk a ni.