Kan tih atan a mawi em tih ngaihtuah chungin fimkhur a tul
Khawsak nawmna duh luatah leh sum leh pai um luatah hian khaw eng a hmuh theih loh fo thin a, mahni zahawmna dah bo a nunphung hlauh phah thak pawh a lo awm theih hle dawnin a hriat.
Tunhnaiah pawh Bangalore Mizo Association (BMA) chuan thuchhuah siamin, bum hmang laka mitin fimkhur turin a ti a, heng bumhmangte hian tawktarh tha tawk neiin, rampawna a thlawna zinna an kawhhmuh a, ruihhlo hmanga sumdawnnaah an hnuklut thin nia sawi a ni bawk.
Hetiang a nih avang hian kan fimkhur a tul a, awlsamna leh nawmsakna ringawt zawng lo a, kan tih atan a mawi em, tih ngaihtuah chunga thutlukna kan siam thiam a tul hle. Chuti a nih loh chuan mahni inrawlh miah lohnaah, mi thangkamah kan awk thei tih kan hriat thar a, kan damchhung hun a thim zawnga kan hman loh a tul awm e.
May thla tawp lam khan South Africa leh Rwanda atanga India rama lut Mizo pasarihte chu Bangalore airport-ah ruihhlo tam tham tak mansak an ni a, heng mite hi a thlawna zin tura thlem chhuah niin Bangalore Mizo Association (BMA) thuchhuahin a tarlang a. A tarlan danin ruihhlo thahnem tak an mansakte hi Aizawla khawsa hmeichhe pakhatin an zinna senso a tumsak a, zin tura sawmtu hian India ram an pan leh hnuah bungrua a kentir a, chung chu ruihhlo thahnem tak lo niin, Bangalore airport-ah custom-in an lo man ta a ni, an ti bawk.
Hetianga ti duhte leh khawsa duh hi an awm nawk lovang tih a sawi theih loh a, mitinte kan fimkhur a, awlsamna ngawt zawng lo a, kan fimkhur zual a tul awm e.