Excise & Narcotics Department (END) chuan chawlhkar hnih chhung ruihhlo do hun an hman mek leh Pathiannia khawvel puma ruihhlo dona ni, International Day Against Drug Abuse & Illicit Traffiking lo thleng tur denchhenin nimin khan ruihhlo thahnem tak a hal ral.
Heng ruihhlo hal ral takte hi Drug Disposal Committee, END-in a tar lan angin kum 2014 atanga 2022 chhunga drug case 124-a mi niin, court-a chin fel tawh a ni.
END Commissioner Ngurchungnunga Sailo-in Bethany Multipurpose Farm, Phunchawng-ah a hal ral a ni.
Ruihhlo hal ral takte hi tual chhung bazarah Rs 264,34,652 man hu a ni a. Heroin kg 8.658; tab 84,291; Ganja kg 50.929; Cough Syrup 87 phials; Alprazolam tab 3,334; Diazepam tab 50; Nitrazepam tab 208; Tramadol tabs 2,290 leh Tramadol cap 1,800 Caps te an ni.
Ruihhlo halral bakah a that lohzia tar lanna thuziak chi hrang hrangte banner & pamphlet/flyer hmanga pho chhuah a ni a, ruihhlo laka fihlim tura online-a intiamna, E-Pledge nei tura mipuite sawmna pho chhuah niin ruihhlo that lohzia mipuite hnena zirtirna tura department-in film a buatsaih thenkhatte chu Pathianni zanah TV-ah tihchhuah an tum a ni bawk.