Kumin May thla khan Lunglei district-a 3121 test zingah malaria hrik pai 228 an awm a. Heng zinga 33 te chu Malaria Pv niin, 195 te Malaria Pf 195 an ni.
Nimin khan Lunglei Baawrhsap Kulothungan hovin Lunglei district Malaria officer Dr Lalrinthangi, zonal entomologist Dr Zahid Ali Khan leh official dang te thukhawmin, Lunglei district-a malaria dinhmun tlangpui leh a do kawnga hmalakna kal mekte an sawiho a. Bawrhsap chuan malaria tam hun a nih chhoh mek avangin a do kawngah leh mipuite zirtir kawngah ngawrh taka hmalak zel a tul thu a sawi.
Lunglei Bawrhsap chuan Lunglei district chhunga malaria tam na hmun western belt - Lungsen, Tlabung leh a chhehvelah te tan lak zual a tul thu sawiin, a mawhphurtute chu hmalak zel dan tur a sawipui a. Malaria do kawnga hmalakna hrang hrang te chu uar leh zuala kalpui turin a hrilh.
Lunglei district chhunga hmasawnna hnathawh hrang hrang kalpui mek – kawngpui siam, eletric line siam etc thawktu contractor te pawh an hnuaia hnathawktute thosilen hman tir vek tura hriattir an ni a. Thosilen te chu NVBDCP, Lunglei district-in a thlawnin damdawia chiah (bed net impregnation) an tihsak theih thu Lunglei district malaria officer Dr Lalrinthangi'n a sawi bawk.
Nimin vek khan Lunglei dist malaria officer Dr Lalrinthangi leh a thawhpui ten Synod Confernce Centre, Salem Veng, Lunglei-ah Lunglei dist-a ASHA 197 awm te kokhawmin, malaria do kawngah training an neihpui a. ASHA te chu anmahni area theuh uluk taka lo vil turin an hrilh a ni.