India rama Muaythai inelna lian ni sarih chhung awh National Muaythai Championship 2022 chu Nilainikhan zawh fel a ni a. He inelnaah hian Mizoram che tha in gold medal panga leh bronze medal pakhat la in a pumpuiah 10-na an ni.
Madhya Pradesh a Dewas khua a nghah National Muaythai Championship 2022-ah hian India ram state leh Union Territoy hrang hrang atangin player 600 chuang zet an tel a, tun tum inelnaah hian Mizoram atangin player 10 chiah an kal.
Gold 22, silver 14 leh bronze 7 latu Assam an che tha ber a, pahnihna Tamil Nadu chuan gold 16, silver 10 leh bronze 10 dawngin pathumna Chhattisgarh chuan gold 13, silver 24 leh bronze 18 an dawng ve bawk.
Mizoram hian kum 2018 leh 2019 khan India-ah overall champion hi an lo ni tawh.
Kumin National Muaythai Championship-ah hian Muaythai fight pangngai bakah professional fight buatsaih tel a ni a, lam intihsiak (Wai Kru Competion) awm bawkin heng intihsiakna dangah hian Mizoram an tel ve lo.
Coach Lalchhuanawma, Zemabawk kaihhruai Mizoram team hian June 27-ah Aizawl an lo thlen beisei a ni a. National Championship-ah hian Mizo international R&J pahnih Liansangpuii Renthlei, Zemabawk North leh Lalhlimpuia, Zonuam te chu chief jury niin inelna an enkawl.
Mizoram team kalna tur senso Chief Minister Zoramthanga’n a tumsak a, Freddy Enterprise, Chanmari-ten Team Track Suit chu tumsak bawkin an chungah Muaythai Association of Mizoram chuan lawmthu a sawi.
Mizoram tana medal latute –
- RC Rohlupuia, Dinthar
(-71kg Youth) GOLD - Eric Biakthianghlima, Thuampui (54kg Youth) GOLD
- Vanlalmalsawmzuala, Ramhlun North (54kg Junior) GOLD
- Lalngaihawma, Hunthar (-51kg Senior Elite) GOLD
- T. C Lalrinawma, Thuampui (-54kg Senior Elite) GOLD
- Paul HD Lalruatkima, Phuaibuang (-54kg Senior) Bronze