Maharashtra-a tangrual sorkara party lian ber, Shiv Sena chuan an MLA hel mekte duh angin an thawhpui party dang pahnih chu an chhuahsan mai thei a. Hetih lai hian deputy chief minister, Nationalist Congress Party hruaitu, Ajit Pawar chuan a tawp thlengin Chief Minister Uddhav Thackeray an thlawp dawn thu a sawi a, Maharashtra Congress chief Nana Patole pawhin Maha Vikas Aghadi sorkar chu boruak a dik loh zel chuan pawn lam atanga an thlawp tur thu a sawi.
Ningani khan Sena MP Sanjay Raut chuan thuthar lakhawmtute hnenah an MLA hel mekten an phut angin, an kir leh a nih chuan Maha Vikas Aghadi chu an chhuahsan mai theih thu a sawi a. Hemi hnuah hian an thawhpui party pahnihin thuchhuah an nei ve nghal.
Sena-in thawhhona an kalsan theih thu a sawi hnu lawkah hian Pawar chuan Raut-a thil sawi hi an party MLA-te a ngenna mai a nih thu a sawi a. “A thil sawi hi sawi zui kan duh lo. An party MLA-te hnena a ngenna pawh a ni thei,” a ti.
NCP leh Congress hi Ningani khan Sena MLA Eknath Shinde-a hova an hel mek avanga an sorkar a buai mek chungchang sawiho hian an thukhawm ve ve a. Sena MLA zingah hel lam hi zawmtu an pung zel bawk.
Chief minister hlui, Congress hruaitu, Prithviraj Chavan chuan an state sorkar nghin mekna chu Delhi atanga ruahman vek a nih thu a sawi a. BJP hruaitu, Devendra Fadnavis pawhin Delhi panin an party hruaitu lawkte thurawn lak a tum mek nia sawi a ni.
NCP an thutkhawm hnuah Chhagan Bhujbal chuan MVA-in MLA an ngah tawk thu leh Sena MLA bâng an la awm loh thu a sawi a. “Uddhav Thackeray-a hi a tawp thlengin kan thlawp dawn a. Sena MLA bâng leh party-in a hnawh chhuah an la awm miah lo va, kan la tam tawk hle,” a ti.
Maharashtra sorkar buaina hi Ningania Raut-a’n darkar 24 chhunga Mumbai-a an MLA hel mekten an let leh a nih chuan MVA sorkar an chhuahsan tur thu a sawiin thil thar hring thei dinhmunah a ding mek a. Thackeray nen pawh an sawi tawh thu leh Guwahati-a an MLA hel mek inkulhte pawh a biakpawh reng thu a sawi bawk a ni.