Silchar tui lian avanga Mizoram mi leh sa tang mek mi 33-te chu nimin khan Mizoram Police leh Silchar Branch YMA-tn an chhan chhuak a, tui lian vanga Mizo tangkhang an awm tawh lo nia hriat a ni.
Mizoram mi leh sa, zirlai leh zin veivakte chu Silchar tui lian avangin an tangkhang nia hriat a ni a, Mizoram sorkar chuan heng mite chhanchhuak tur hian Nilaini khan Mizoram Police mi 29 a tir.
Police hotute hnen atanga The Zozam Times thudawn danin police mi 29-te hian bus pakhat leh sumo pakhatin Silchar panin, Nilaini zan dar 9:30 velah Synod Mission Compound an thleng a, chhanchhuah hna hi Silchar Branch YMA leh police chuan Ningani zing dar 6 atangin an thawk tan a ni.
Silchar khaw chhunga tanpui ngai nia an hriat mi 33-te an awmna hmun atangin lawng hmangin Mission Compound-ah hruai chhuah vek an ni a, Silchar YMA leh Mizoram Police-te hian NDRF leh Assam Regiment, Masimpur ten an chhanchhuah theih loh hnam dang mi 10 chuang chu an chhanchhuak tel bawk.
Tuilian avanga tangkhang an chhanchhuah tak mi 33 zinga mi 16-te chuan Mizorama haw nghal an duh angin an chuanna tur sumo pakhat chu nimin tlai khan Silchar-ah hian tirh thlak nghal a ni.
The Zozam Times zawhna chhangin YMA, Silchar Branch President K Vanlalhriata chuan Ningani khan tui lian chu a ziaawm tan deuh tawh tih a sawi a, hmun thenkhatah chuan tui hi a kâm tawh a, a la tlin tamna hmunte pawh a awm tih a sawi.
Silchar branch YMA president chuan tun dinhmunah tui lian avanga tangkhang buaipui ngai an awm tawh lo nia an hriat thu sawiin, harsatna tawk an lo la awm palh thei a nih avangin a theih ang anga ngaihven chhunzawm zel an tum thu a sawi a ni.
Silchar khawpui chhunga tui lian nasa avang hian lirthei hmanga inkalpawh hleih theih a ni lo a, hei vang hian Assam atanga Mizorama lirthei rawn lut a awm mumal thei lo a, Nilaini zing dar 8 atanga Ningani zing dar 8 thleng khan Vairengte Police Check Gate paltlang lirthei 88 chauh a awm.