Myanmar rama mipui rorelna a awm theih nana beihnaa an hruaitu, Aung San Suu Kyi chu hun rei tak pawn chhuak theih lova hren a nih hnuah an khawpui, Nay Pyi Taw-ah lung inah a hranga khung a ni leh ta.
Kum 77 mi, Nobel Peace Prize pawh lo dawng tawh hi sipaiten February, 2021-a mipui thlan, a kaihhruai sorkar an paih thlak hnuah an hreng mek a ni.
Nikuma paih thlak a nih atang khan an khawpuiah hian khawiah nge tih hriat loh hmunah an hreng char char a ni.
Sipai court chuan thubuai chi hrang hrangah thiam loh chantirin kum 11 lung in tang turin an hrem a, a bak thubuai pawh a la nei mek a. Dan bawhchhiaa an puhnate erawh a pha vek thung.
Tuna an tantirna hmun tharah hian a chungthu an an relna tur court siamin a thubuai dangte hi ngaihtuah chhunzawm a nih rin a ni.
Sipai sorkarin thuchhuah tawi tê an tihchhuahah Myanmar-a criminal law zawmin an khung hrang mek tih an tar lang.
Mihring dikna chanvo humhalhtu pawl hrang hrangte chuan court-a a chung thu rel a nih dan chu a dik lo hle tih an sawi a. A chungthu an rel hian mi dang awm phal a ni lo va, vantlang leh chanchinbute pawhin an hre phak lo va, Suu Kyi-i dan hre mite ngei pawh chanchinbumite hnena thil an sawi khapsak an ni bawk.
Chhuttu thenkhat chuan Myanmar rama huhang nei na tak, Suu Kyi-i hian an puhna zawng zawnga thiam loh a chang a nih chuan kum 190 chuang lung in tan a hmabak thei dawn niin an chhut.
Sipaite hian Suu Kyi-i kaihhruai, National League for Democracy (NLD)-in an ram inthlanpuia hnehna an chan chu pawm lovin nikum February khan thuneihna hi an chhuh lui.
Sipaite hian inthlanah hian vote tihchingpen a awm niin an sawi a; mahse, a hrana chhuitute chuan chutiang a awm lo niin an sawi ve thung.
Mipui sorkar paih thlak a nih leh hian an ram pumah mipuiin duh lohna nasa takin an lantir a, sipaite hian tharuma chhangin dodaltu leh chanchinbumite thlengin an bei let.
Thuneihna an chan leh hnuah Suu Kyi-i bakah an party member thahnem tak man an ni a, sipaiten an man zawng zawng hi mi 14,000 chuang nia hriat a ni.
Assistance Association for Political Prisoners (Burma)-in a chhinchhiah dan chuan sipaite hian anmahni dodaltute an beih letnaah mi 2,000 vel an thi tawh niin an sawi bawk.
Sipai rorelna duh lohna hi tun thlengin a la kal zel a, an ram hmun thenkhatah phei chuan tharum nena silai kenga dodal an awm mek.