India rama Supreme Court chuan kum 2002-a thil thleng, Gujarat riots an tih maia Prime Minister Narendra Modi-a thiam chantirna khin letna chu hnawlin thiam a channa hi a pawm nawn leh.
Kum 2013 khan Gujarat-a court chuan Supreme Court-in chhui tura a tihten an chhuina behchhanin Modi-a hi thiam a lo chantir tawh chu a lo pawm tawh bawk.
Tun tumah hian Congress MP thin, buaina chhuaka thi, Ehsan Jafri-a nupui, Zakia Jafri chuan court sang berah hian Modi-a thiam chantirna hi a khing tha leh a ni.
Kum 2002-a buaina chhuak kha India rama sakhaw thil avanga tharum thawhna thlengah chuan thi an tam ber tum a ni.
Hindu biakzinte chuan rel kangah mi 60 lai an thih hnuah buaina hi chhuakin mi 1,000 chuang an thi a, a tam ber hi Muslim an ni.
Jafri-i hian Supreme Court-ah hian tharum thawhna thleng phena ‘inphiarna lian tak’ awm chu chhui that leh a ngiat a. Chhuina hmasaa chhuitute khan phirtute hi him tumin an thawk niin a puh bawk.
Court sang ber hian Jafri-i bakah a chhuitute leh thu hretu dangte thu hriat leh thil thleng an hriatte a ngaihthlak hnuah December, 2021 khan thubuai hi a titawp a ni.
Zirtawpni khan court chuan kum 2013-a court-in thu a lo tihtluk tawh chu pawmin a chhuitute thil hmuhte pawh a pawmpui tih a puang a ni.
Court hian Jafri-i thu thlen chu hnawlin thil tul tawh lo a ti a ni.
Ehsan Jafri-a hi Muslim politician hriat hlawh tak thin niin Ahmedabad khawpuia Gulbarg Society residential complex-a tharum thawhna thlenga thi mi 68 zingah a tel a ni.
Hetih laia Gujarat chief minister, Modi-a hian Muslim laka tharum thawhna tihtawp tumin hma a la nep hle nia puh a ni a, amah erawh chuan a pha thung.
Tharum thawhna thleng hi Gujarat police leh Supreme Court-in kum 2008-a chhuitu tur a din, Special Investigation Team (SIT)-in an chhui a ni.
Kum 2012-ah chhuitute hian report thehlutin buaina leh Modi-a hian inzawmna a neih an hmuh loh thu an sawi.
Gulbarg-a thil thleng bikah pawh hian inhnamhnawih nia sawi mi dang 63-te pawh an tel ve tih finfiahna a awm lo niin an sawi a, heng zingah hian sorkar hotu liante pawh an tel.
An report-ah hian sorkar mi pawimawh zinga mite an inrawlh tih finfiahna tha tawk hmuh a ni lo niin an tar lang a ni.
Jafri-i chuan heng an chhuina hi ‘sorkar hnathawkte hum tumna, police inrawlhna thup tumna’ niin a sawi a, tharum thawhna thlenga thil thleng ngawr ngawr chauh an chhui niin a sawi ve thung.