Mizoram Aam Aadmi Party (AAP) hruaitute chuan nakkum MLA inthlanpuiah chuh ngei an tum thu sawiin, central-a party hmunpui atangin ruahmanna erawh siam a nih tur thu an sawi.
Nimin khan Aizawl Press Club-ah thu thar thehdarhtute kawmin Mizoram AAP hruaitute chuan central lam atangin party din pawmpui an nih tawh hnuah nakkum MLA inthlanpui lo awm turah chuh ngei an tum thu an sawi.
“Nakkum inthlanah chuh kan tum a. Seat engzat nge kan chuh dawn tih erawh kan la hre lo,” tia sawiin, central lama an party hotute nen ruahmanna an la siam dawn niin an sawi.
Kum 2023 MLA inthlanpui lo awm turah pawh AAP party aiawha ding tur chuan mi dik leh mi tha pen chhuak se an duh a. “Mizoram siam tha duh mi, mi tha leh dik tan hmun a awm reng a ni,” an ti.
AAP chuan inthlan dawna sum sem an hmatheh ve dawn loh thu leh MLA candidate tur pawh beisei loh tak tak an ni thei tih sawiin, “Mi dik leh tha tak tak an ni ngei ang tih kan ring tlat a. Cheng khat pawh chhuan tur nei lo mah se, mi dik leh tha an nih phawt chuan AAP danah chuan an tling zo em em dawn a ni,” an ti bawk.
Mizoram AAP hruaitute chuan Mizoram chhunga district-ah te, constituency, khua leh veng hrang hrangah organising board-te chuan thawhpui tur mi an zawng mek tih an sawi a. Mizoram that theih loh chhan chu eirukna vang tih sawiin, eirukna nuai bo chu AAP tum ber a nih avangin, thalai ram vei leh dikna duh, a taka hnathawk thei pen chhuaka AAP-ah inziak lut turin an sawm tih an sawi.
‘AAP hi Mizoramah pawh ding se Mizo bawk hruaitu an nih chuan engmah an ni leh chuang lo ang,’ tia sawi chungchangah, “AAP hian kalphung leh ruangam fel tak a nei vek a, mi pamham leh suma rinawm lote tan hmun a awm lo a, mahni insenralna leh inpekna tel lo chuan AAP hi zawm chi a ni lo, Mizoram AAP chuan central lama party kalphung fel tak hi a zawm mai dawn a ni,” an ti.
May 16, 2022-a AAP party aiawh hmarchhak viltu, Rajesh Sharma hoa Mizoramah AAP ruangam an din hnuah, ram chhung hmun hrang hrangah member zawngin an feh chhuak nghal a. Tun dinhmunah member hi 1,000 chuang inziak lut awm tawhin thalai kum 30-50 inkar an tam ber a. Tunah hian Organising Board-ah mi 29 an awm mek niin an sawi.