India chuan lirnghing magnitute 5.9-a nain a sawia mi 1,000 chuang zet an thih hnuah Afghanistan chu rikrum thila puihna chi hrang hrang tonne 27 an thawn.
Puihna thilte hi thlawhna pahnih hmangin thawn a ni a, pakhatah hian technical team chuangin Kabul-a Indian Embassy-a palai hna thawk tura tihte an ni a. Hei hi nikum August thlaa Taliban-in thuneihna an chan hnua India-in Afghanistan-a palai a thawn leh hmasa ber a ni.
External Affairs Minister S Jaishankar chuan puihna thawn hi ‘puihna hmasa’ a nih thu Twitter-ah a tar lang.
Puihna thawn zingah hian ni tin mamawh – puan in, sleeping bag, kawmawl leh mutbu a tel a. United Nations Office for Coordination of Humanitarian Affairs (UNOCHA) leh Kabul-a Afghan Red Crescent Society (ARCS) hnenah hlan tur a nih thu external affairs ministry chuan a sawi.
“Engtik lai pawhin India hi Afghanistan mipuite tan a awm reng a, kum za chuang inkungkaih tawh kan ni a, rang takin an mamawhah hian puih kan inhuam reng a ni,” tiin ministry chuan thuchhuahah a tar lang.
Hmanruate hi Indian Air Force thlawhna lian hmanga thawn a ni a, mihringte chu Kam Air thlawhna hmanga thawn a ni.
Nilaini zinga lirnghing hi Khost khawpui atanga hla lo tê-a intan a ni a. Ruah nasa takin a sur zui a, hmanrua an neih that bawk si loh avang leh a chhengchhiat bawk avangin chhanchhuah hna thawh a chak lo hle a. Hluma siam in tam tak a chim a, in chimin a chhilh tam tak an la awm ngei rin a ni.
Kabul-a Taliban sorkar hi eibarah an buai hle a, an ram mipui hmun thuma hmun khat vel hi tam dinhmuna ding an ni.
UNOCHA chuan kum 10 liam ta chhung khan Afghanistan-ah hian mi 7,000 chuang an thi tih an sawi a. Nilainia lirnghinga thi zat en chuan tun kum 20 chhunga lirnghing avanga thi an tam ber tum niin United States thuneitu pakhat chuan a sawi.
India-in puihna leh palai a thawn hi Taliban a tilawm hle a, Afghan mipuite a tilawm hle tih an sawi.
Taliban foreign ministry thupuangtu chuan Afghanistan-a Indian palai tirh a ni leh embassy hawn a ni leh tur chu lawmawm an tiin an himna pawh ngaihtuah a nih tur thu a sawi.
Thupuangtu hian tuna embassy awm mekte pawh an compound chhung himna chu ram danga palaite venhimna pek ang vek a nih thu a sawi bawk.
Taliban hian ram dangte pawh an palaite tira an embassy-te hawng leh tawh turin an ngen bawk.