Hna thawh zawha intihhahdam nana zu in hi mi tam tak intihthawvenna a ni a; mahse, Japan-a hnathawktu pakhat tan chuan buaina zakhua thlentu a ni mek.
A thiante nena an zan hnathawk zo zu an innaah USB memory stick (pendrive) a tibo hlauh mai a, thil a buaithlak zo ta vek.
A pendrive-ah hian mihring maktaduai chanve dawn nihna kimchang (personal detail) a awm miau avangin a nghawng a lian hle.
A hming tar lan loh pa pakhat hian a memory stick hi a ipte (bag)-ah dahin Osaka hmarthlang lama Amagasaki khawpuiah a zan hnathawk zo a chawlh hahdamna lamah a hloh ta tlat a ni.
Tual chhung chanchinbuten an tar lan dan chuan thingpui dawrah hian darkar eng emaw zat a chawl khawmuang a, a haw ta chauh a ni.
A hnuah a hriat chhuaha a’n indap chuan a bag leh memory stick chu a awm ta lo tih a hre ta a ni.
Japanese broadcaster NHK chuan mipa kum 40 chho vel hi a thawhna company-in chhiah awl thei chin tur chhungkua an chhinchhiahtir a, heng chhungkuaa chengte nihna leh dinhmun hi lak vek a ni.
Amagasaki-a cheng zawng zawngte nihna kimchang hi Thawhlehni zana a thawhpuite nen zu an inho hma hian a pendrive-ah hian a dah ngei a ni.
Khawpui thuneitute chuan an thil chhinchhiahah hian hming, pian ni leh thla leh kum leh an chenna a awm vek a. Heng bakah hian mi dangin an hriatpui atana tha lem lo – chhiah pek dan kimchang te, bank account number leh pawimawh dang a awm teuh niin an sawi.
Pendrive tibotu hi a vanduai hle rualin vanneihna pakhat a nei a, a pendrive-a a thil pawimawh dah hi encrypt vek niin en tur chuan password a ngai hlauh va. Tun thleng chuan an data lak khawm hi lo ena lo hmang tangkai duh an awm âwm an la hre lo.
Tumahin la hmang tangkai lo angin lang mah se thuneitute an buai phah a, mipui hnenah ngaihdam an dil nasa a. Mayor leh hruaitu dangte pawhin hre thiam hram turin an ngen.
“Khawpuia thuneituten vantlangin min rinna kan tichhia hi pawimawh kan ti tak zet a, in mi hriat thiam kan ngai a ni,” tiin Amagasaki khawpui thuneitu sang pakhat chuan thuthar lakhawmtute a kawmnaah a sawi.