Newcastle United chuan Premier League atanga EFL Championship a tla thla Burnley hnen atangin England goalkeeper Nick Pope chu an lalut.
Kum 30 mi hian St. James’ Park-ah hian kum li contract a ziak a, Turf Moor-ah season ruk a hman hnuah England hmar lam a pan.
Magpies boss Eddie Howe chuan a goalkeeper thar chu, “Premier League leh international football thlenga goalkeeper tha a ni a. Position pawimawh taka kan tana inkhelhna hmun chang tura bei tur player tha tak kan neih belh hi ka lawm hle.” a ti.
Pope hian kum 2016 khan Burnley hi Premier League a an kaisan kumah a zawm a, an tan vawi 155 inkhel tawhin season liamta khan vawi 36 a inkhel.
Clarets hian 2017-18 season a Europa League khelpha tura season an hman that tumin Pope hi goal vengtu pawimawh a ni a, a chetthat avangin England squad-ah koh a ni.
Kum 2018 khan England tan hian a vawikhat nan a inkhel a, Costa Rica a hmachhawn. Nikum March thla khan England chanchin a goalkeeper in a match hmasa paruk chhunga goal chhuah miah lo thei awmchhun a ni.
“Insawnna ti fel turin kar hnih vel ka nghah a ngai a, tunah ka club thar ka zawm hi ka lungawi hle.” a ti.
Pope hi Magpies in tun nipui a player an lakluh pahnihna a ni a. Aston Villa atangin left-back Matt Targett chu Pound maktaduai 15 in an lalut tawh.